శ్మశానవాటిక విషయంలో కులాల గొడవ.. గ్రామంలో అలజడి

శ్మశానవాటిక స్థల వివాదం గ్రామంలో రెండు కులాల మధ్య చిచ్చు పెడుతోంది. రంగారెడ్డి జిల్లా చేవెళ్ల నియోజకవర్గం దామరగిద్ద గ్రామంలో గత రెండు నెలలుగా ఇరు వర్గాల మధ్య ఘర్షణ కొనసాగుతోంది. దామరగిద్ద గ్రామంలో గత ప్రభుత్వాల హయాంలో బీసీలకు శ్మశానవాటిక కోసం రెండు ఎకరాల భూమిని కేటాయించారు. బీసీ కులస్థుల్లో ఎవరు మరణించినా అక్కడే దహన సంస్కారాలు నిర్వహిస్తున్నారు. అయితే, ఆ భూమిని ఆనుకొని ఎస్సీ వర్గానికి చెందిన గృహాలు ఉన్నాయి. తమ నివాసాలకు చెంతనే దహన సంస్కారాలు నిర్వహించడం ఇబ్బందికరంగా ఉందని వారు ఆవేదన వ్యక్తం చేస్తున్నారు. దీంతో కొంత కాలంగా ఇరువర్గాల మధ్య ఘర్షణాత్మక వాతావరణం నెలకొంది.

గ్రామంలో బీసీ వర్గానికి చెందినవారు ఎవరు మరణించినా.. దహన సంస్కారాల్లో పాల్గొనబోమని ఎస్సీ వర్గం ప్రజలు తీర్మానించుకున్నారు. ఇది ఇరువర్గాల మరిన్ని గొడవలకు కారణమైంది. సోమవారం (ఏప్రిల్ 10) దామోదర్ అనే గ్రామస్థుడు మృతి చెందారు. దహన సంస్కారాలు నిర్వహించేందుకు శ్మశానవాటిక వద్దకు తీసుకెళ్లగా.. ఇక్కడ అంత్యక్రియలు నిర్వహించొద్దంటూ ఎస్సీ వర్గం వారు పెద్ద ఎత్తున ఆందోళనకు దిగారు. ఇరు వర్గాలు దాడులు చేసుకోవడంతో పరిస్థఇతి ఉద్రిక్తంగా మారింది.

సమాచారం అందుకున్న చేవెళ్ల ఏసీపీ ప్రభాకర్ తన సిబ్బందితో కలిసి దామరగిద్ద గ్రామానికి వచ్చారు. ఇరు వర్గాల ప్రజలకు నచ్చజెప్పి దహన సంస్కారాలు జరిగేలా చూశారు. ఈ సమస్యను ఉన్నతాధికారుల దృష్టికి తీసుకెళ్లి, పరిష్కరించేందుకు కృషి చేస్తామని ఆయన హామీ ఇచ్చారు.