Hyderabad ప్రజలకు అలర్ట్... ఆ రూట్లలో 10 రోజుల పాటు ట్రాఫిక్ ఆంక్షలు.. ప్రత్యామ్నాయ మార్గాలు ఇవే..

Hyderabad: హైదరాబాద్‌లో పలు ప్రాంతాల్లో నేటి నుంచి ట్రాఫిక్ ఆంక్షలు అమల్లో ఉండనున్నాయి. ఈ మేరకు నగర ట్రాఫిక్ పోలీసులు వెల్లడించారు. అంబర్‌పేటలో ఈ నెల 30 నుంచి మార్చి 10 వరకు ట్రాఫిక్ ఆంక్షలు అమల్లో ఉండనున్నట్లు స్పష్టం చేశారు. అలాగే లంగర్ హౌస్ దగ్గర నేడు ఒక్కరోజు ట్రాఫిక్ ఆంక్షలు అమల్లో ఉండనున్నాయి.అంబర్‌పేటలో ఎన్‌హెచ్ 163పై ఫ్రై ఓవర్ నిర్మాణ పనులు జరుగుతున్నాయి. దీని కారణంగా సోమవారం నుంచి మార్చి 10 వరకు ట్రాఫిక్‌ను దారి మళ్లించనున్నామని, వాహనదారులు ప్రత్యామ్నాయ మార్గాలు చూసుకోవాలని ట్రాఫిక్ పోలీసులు సూచించారు. జిల్లా ఆర్టీసీ బస్సులు, ఇతర భారీ వాహనాలు ఉప్పల్ నుండి 6 నెం. జంక్షన్ వైపు వచ్చే మార్గంలో హబ్సిగూడ క్రాస్ రోడ్డు, తార్నాక, ఉస్మానియా దూర విద్యా రహదారి, అడిక్‌మెట్ ఫ్లైఓవర్, విద్యానగర్, ఫీవర్ హాస్పిటల్, బర్కత్‌పురా, టూరిస్ట్ హోటల్, నింబోలియద్ద, చాదర్‌ఘాట్ రూట్లకు మళ్లిస్తున్నట్లు తెలిపారు.

ఉప్పల్ నుంచి జంక్షన్ నెంబర్ 6వైపు వచ్చే సిటీ ఆర్టీసీ బస్సులు, సాధారణ వాహనాలను గాంధీ విగ్రహం, ప్రేమ్ సదన్ పోలీస్ బాయ్స్ హాస్టల్, సల్ధానా గేట్, అలీ కేఫ్ క్రాస్‌రోడ్స్, గోల్నాక, నిమోబ్లియాద్దా, చాదర్‌ఘాట్ వైపు మళ్లిస్తున్నారు. 6వ నెంబర్ జంక్షన్ నుంచి ఉప్పల్ వైపు వెళ్లే వాహనాలను అనుమతిస్తారు.

ఇక మహత్మాగాంధీ వర్ధంతి సందర్భంగా బాపూ ఘాట్‌కు పలువురు వీఐపీలు వస్తున్నందున లంగర్ హౌస్ వద్ద సోమవారం ట్రాఫిక్ ఆంక్షలు విధిస్తున్నట్లు ట్రాఫిక్ పోలీసులు తెలిపారు. ఉదయం 10 గంటల నుంచి 11.30 గంటల వరకు బాపూ ఘాట్, లంగర్ హోస్. నానల్ నగర్, ఆంధ్రా ఫ్లోర్ మిల్, సంగం బస్ స్టాఫ్ వద్ద ట్రాఫిక్‌ను ఆపేయడం లేదా దారి మళ్లించడం జరుగుతుంని స్పష్టం చేశారు. వాహనదారులు సహకరించి ప్రత్యామ్నాయ మార్గాలు చూసుకోవాలని సూచించారు.

• Read More Telangana News And Telugu News