Medchal: మంత్రి మల్లారెడ్డికి షాక్.. సొంత పార్టీ నేత ఫైర్, మీటింగ్‌లో రచ్చ

తెలంగాణ కార్మిక శాఖ మంత్రి మల్లారెడ్డికి బిగ్ షాక్ తగిలింది. సొంత నియోజకవర్గంలోనే ఆయనకు చుక్కెదురైంది. తనను అవమానించారంటూ మేడ్చల్ జిల్లా పీర్జాదిగూడ్ టీఆర్‌ఎస్ అధ్యక్షుడు దయాకర్ రెడ్డి మంత్రితో వాగ్వాదానికి దిగారు. శామీర్‌పేట్‌లో జరిగిన మేడ్చల్ నియోజకవర్గ విస్తృత స్థాయి సమావేశంలో రసాభాస చోటుచేసుకుంది. చైర్మన్లు, డిప్యూటీ చైర్మన్లు.. అధికారిక పదువులు ఉన్నవారికే గౌరవం దక్కుతోందని దయాకర్ రెడ్డి అసహనం వ్యక్తం చేశారు. పార్టీ అధ్యక్షులకి అవమానం జరుగుతోందంటూ మండిపడ్డారు.

ఇది పార్టీ మీటింగ్ అని.. పార్టీ అధ్యక్షులకి గౌరవం ఇవ్వరా అని ఆయన ప్రశ్నించారు. మంత్రి మల్లన్న కలగజేసుకుని సర్దిచెప్పే ప్రయత్నం చేసినా ఫలితం లేకపోయింది. తన వద్ద నుంచి మైక్ లాగేసుకున్నారంటూ దయాకర్ రెడ్డి ఆగ్రహంతో స్టేజీ దిగి వెళ్లిపోయారు. కారు ఎక్కి వెళ్లబోతున్న దయాకర్ రెడ్డిని పార్టీ నేతలు వారించే ప్రయత్నం చేశారు. మైక్ ఎందుకు లాగేసుకున్నారంటూ ఆయన ఆగ్రహం వ్యక్తం చేశారు. ప్రతిచోటా అవమానాలే జరుగుతున్నాయంటూ ఆయన వాపోయారు. ఇంతకీ ఈ వివాదం ఎటు దారితీస్తుందో చూడాలి మరి!!

Also Read: