GHMC Mayor: దేవుడిపై భారం వేసిన మేయర్.. హైదరాబాదీలకు షాక్!

జీహెచ్ఎంసీ మేయర్‌గా ఎన్నికైన గద్వాల విజయలక్ష్మి ఎవరూ ఊహించని రీతిలో వ్యాఖ్యలు చేశారు. వచ్చే ఐదేళ్లూ వర్షాలు రాకూడదని దేవుణ్ని మొక్కుకుంటానంటూ ఆమె చేసిన వ్యాఖ్యలు వైరల్ అయ్యాయి. గత ఏడాది కురిసిన వర్షాలకు హైదరాబాద్ నగరం అతలాకుతలమైన సంగతి తెలిసిందే. ఈ నేపథ్యంలో హైదరాబాద్ ప్రజలకు ఎలాంటి భరోసా ఇస్తారని.. ఓ న్యూస్ ఛానెల్ ప్రతినిధి అడిగిన ప్రశ్నకు ఆమె పై విధంగా స్పందించారు. నాలాల ఆక్రమణలను తొలగించడం పెద్ద సమస్య అని ఆమె అంగీకరించారు.

వచ్చే ఐదేళ్లలో వర్షాల కారణంగా ప్రజలు ఇబ్బందులు పడకుండా ఉండేందుకు తాను ఏం చేస్తానో.. తన ప్రణాళికలు ఏంటో వివరించాల్సిన మేయర్.. వర్షాలు పడకుండా దేవుణ్ని ప్రార్థిస్తానంటూ మాట్లాడటం ఏంటని జనం ప్రశ్నిస్తున్నారు. ఈ ఐదేళ్లూ వర్షాలు పడకపోతే.. మీరు సేఫ్ కానీ.. భారీ వర్షాల నుంచి జనాన్ని కాపాడటానికి ఏం చర్యలు తీసుకోరా అనే ప్రశ్న తలెత్తుతోంది.

ఆమె నోరు జారి మాట్లాడి ఉంటారనే భావనా వ్యక్తం అవుతోంది. కానీ బాధ్యతాయుతమైన పదవుల్లో ఉన్న వ్యక్తులు పొరబాటున కూడా ఇలాంటి మాటలు మాట్లాడొద్దని ఈ ఉదంతం నిరూపిస్తోంది.

నగరవాసులు మంచినీరు, నిరంతర విద్యుత్, పారిశుద్ధ్య సదుపాయాలను కల్పించిన రోజు.. తాను విజయవంతమైన మేయర్‌ అయినట్లని విజయలక్ష్మి తెలిపారు. ఆమె మేయర్‌గా ఎన్నికైన నాటి నుంచే.. వివాదాలు చుట్టు ముడుతున్నాయి. ఆమె అనుచరుడి ఫ్లెక్సీని జీహెచ్ఎంసీ తొలగించడంతోపాటు భారీ జరిమానా విధించింది. తర్వాత షేక్‌పేట్ ఎమ్మెల్యే బదిలీ వ్యవహారం వెనుక కూడా ఆమె ప్రమేయం ఉందనే ప్రచారం జరిగింది.