HYD: సవతి తల్లి కర్కశం.. ఏడేళ్ల కుమారుడిపై ఎంతటి దారుణమంటే?

ఓ మహిళ మానవత్వాన్నే మరిచి సవతి కొడుకుపై దారుణానికి పాల్పడింది. ఏకంగా గొంతు నులిమి హత్య చేసింది. ఈ ఘటన హైదరాబాద్ కాచిగూడ పోలీస్ స్టేషన్ పరిధిలో చోటు చేసుకుంది. వివరాల్లోకి వెళ్తే.. భాస్కర్‌ అనే వ్యక్తి కుటుంబ సభ్యులతో కలిసి గోల్నాకలో నివాసముంటున్నాడు. అయితే అతని ఏడేళ్ల కుమారుడు ఉజ్వల్‌ రెండు వారాల కింద భవనంపై నుంచి పడిపోయాడు. దీంతో అతడికి గాయాలయ్యాయి.

ఈ క్రమంలోనే గాయపడిన బాలుడిని ఆస్పత్రిలో చేర్పించగా కోలుకుని ఇంటికి వచ్చాడు. ఈ నేపథ్యంలోనే శనివారం ఉజ్వల్‌ను సవతి తల్లి సరిత గొంతు నులిమి ఊపిరాడకుండా చేసి హత్య చేసింది. అయితే కోలుకున్న కొడుకు ఉన్నపళంగా చనిపోవడంతో తండ్రి భాస్కర్‌కు అనుమానం వచ్చింది. దీంతో నేరుగా పోలీసులను ఆశ్రయించాడు. తన కుమారుడి మృతిపై అనుమానాలున్నట్లు ఫిర్యాదు చేశాడు.

దీనిపై కేసు నమోదు చేసిన పోలీసులు విచారణ చేపట్టగా.. దిగ్భ్రాంతికర విషయాలు వెలుగులోకి వచ్చాయి. సరిత తన సవతి కుమారుడిని పథకం ప్రకారమే హత్య చేసినట్టు విచారణలో తేలింది. రెండు వారాల కింద భవనంపై నుంచి తోసేసినా బతకడంతో గొంతునులిమి చంపినట్టు వెల్లడైంది. ముందు అనుమానాస్పద మృతిగా నమోదు చేసిన కేసును హత్య కేసుగా మార్చారు. నిందితురాలిని అదుపులోకి తీసుకొని దర్యాప్తు చేస్తున్నారు.