హైదరాబాద్‌లో షాకింగ్ ఘటన.. నిద్రమత్తులో నడుచుకుంటూ యువకుడు మృతి

రాత్రి నిద్రపోయిన యువకుడు తెల్లారేసరికి విగతజీవిగా మారాడు. ఈ ఘటన హైదరాబాద్‌లో జరిగింది. భవనంపై పడుకున్న యువకుడు నిద్ర మత్తులో నడుచుకుంటూ వెళ్లి పక్కనున్న మరో బిల్డింగుపై పడి మృతిచెందాడు. ఈ ఘటన నగరంలోని సైఫాబాద్‌ పోలీస్‌ స్టేషన్‌ పరిధిలో జరిగింది. రాజస్థాన్‌కు చెందిన సత్యనారాయణ ప్రజాప్రతి (20) మిత్రులతో కలిసి భవన నిర్మాణ పనులు చేస్తున్నారు. ఆదర్శ్‌నగర్‌లోని హిల్‌పోర్ట్‌ కాలనీ 5వ వీధిలో నిర్మాణంలో ఉన్న భవనం మొదటి అంతస్తులో పని చేస్తోన్న వీరంతా గురువారం రాత్రి రెండో అంతస్తులో పడుకున్నారు.

అయితే శుక్రవారం ఉదయం సత్యనారాయణ పక్క భవనంపై పడి ఉన్నాడు. ఇది గమనించిన పక్క భవనం వాచ్‌మన్‌ ఇంటి యజమానులకు విషయం చెప్పాడు. పక్క భవనంలో పని చేస్తోన్న వారిగా గుర్తించి సమాచారమిచ్చారు. అపస్మారకస్థితిలో ఉన్న అతడిని ఉస్మానియా ఆస్పత్రికి తరలించగా శుక్రవారం మృతి చెందాడు. మృతుడి బంధువు ముఖేష్‌ ప్రజాప్రతి పోలీసులకు ఫిర్యాదు చేశారు. దీంతో సైఫాబాద్‌ పోలీసులు అనుమానాస్పద మృతిగా కేసు నమోదు చేసి దర్యాప్తు చేస్తున్నారు.