బంజారాహిల్స్ ప్రమాదం.. ఆలయాన్ని ఢీకొట్టిన కారు

హైదరాబాద్ బంజారాహిల్స్‌లో ఓ కారు బీభత్సం సృష్టించింది. ఓ యువకుడు ర్యాష్ డ్రైవింగ్ చేస్తూ కారుతో ఓ ఆలయాన్ని ఢీకొట్టాడు. ఈ ఘటనలో ఆ యువకుడు తీవ్రంగా గాయపడగా సమీపంలోని ఆస్పత్రికి తరలించారు. బంజారాహిల్స్‌ రోడ్‌ నంబర్‌-12లో ఆదివారం తెల్లవారుజామున ఈ ఘటన చోటుచేసుకుంది.

ఈ ఘటనపై సమాచారం అందుకున్న పోలీసులు సంఘటనా స్థలానికి చేరుకుని పరిశీలించారు. అతివేగంగా నడపడం వల్లే కారు అదుపుతప్పి యాక్సిడెంట్ జరిగినట్లు ప్రాథమికంగా నిర్ధారించారు. అయితే అతడు మద్యం సేవించి ఉన్నాడా? లేదా? అన్నది తెలియాల్సి ఉంది. కారు పల్టీలు కొడుతూ కొంతదూరం ఈడ్చుకుంటూ వెళ్లిపోయిందని ప్రత్యక్షసాక్షులు చెబుతున్నారు. గాయపడిన యువకుడు ప్రస్తుతం అపోలో ఆస్పత్రిలో చికిత్స పొందుతున్నాడు. ఈ ప్రమాదంపై కేసు నమోదు చేసి దర్యాప్తు చేపట్టినట్లు బంజారాహిల్స్ పోలీసులు తెలిపారు.