'మా నాన్న ఏపీ ఎమ్మెల్సీ .. నేను వైఎస్సార్‌టీపీ నగర అధ్యక్షుడిని..' వెలుగులోకి యువకుడి దందా

హైదరాబాద్‌ (Hyderabad) లో ఓ యువకుడు సరికొత్త దందా (Cheating) కు తెరలేపాడు. తన తండ్రి ఆంధ్రప్రదేశ్‌ (Andhra pradesh) కు చెందిన ఎమ్మెల్సీ (AP MLC) అని.. తాను వైఎస్సార్ తెలంగాణ పార్టీ (YSR Telangana Party) నగర అధ్యక్షుడిని అంటూ.. హైదరాబాద్‌లో మోసాలకు పాల్పడుతున్న ఘటన వెలుగుచూసింది. పొలిటికల్ బ్యాగ్రౌండ్ (Political Background) పేరు చెప్పుకుని.. ఐటీ సంస్థ (IT Company) కు చెందిన నిర్వాహకుడిని మోసం చేసి లక్షల్లో డబ్బులు కాజేస్తున్నాడు ఓ యువకుడు. ఎస్సార్ నగర్‌లోని అంకమ్మ బస్తీకి చెందిన కార్తీక్ రెడ్డి అనే యువకుడు... తన తండ్రి ఆంధ్రప్రదేశ్‌కు చెందిన ఎమ్మెల్సీ రామ్మోహన్ రెడ్డి అని చెప్పటమే కాకుండా.. తాను వైయస్సార్ తెలంగాణ పార్టీలో కాబోయే నగర అధ్యక్షుడిని అంటూ ప్రచారం చేసుకుంటున్నాడు. అక్కడితో ఆగకుండా.. ఆయా సంస్థల నిర్వాహుకులను మాయమాటలు చెప్పి లక్షల్లో డబ్బు గుంజుతున్నాడు. ఈ నేపథ్యంలోనే కార్తీక్ రెడ్డి వలలో చిక్కుకుని ఓ ఐటీ సంస్థ నిర్వాహకుడు లక్షల్లో డబ్బులు పోగొట్టుకున్నాడు.తాను వైఎస్సార్ తెలంగాణ పార్టీలో త్వరలోనే నగర అధ్యక్షుడిని కాబోతున్నానని చెప్పుకుంటూ జీపీఎస్ ఇన్ఫోటెక్ ఐటీ సంస్థ నిర్వాహకుడైన సూర్యవంశీ ప్రకాష్‌ను నమ్మించాడు. ఇదే క్రమంలో.. అతని వద్ద నుంచి 28 లక్షల రూపాయలు వసూలు చేశారు. అయితే.. అనుమానం వచ్చిన సూర్యవంశీ ప్రకాష్ బ్యాగ్రౌండ్ వెరిఫికేషన్ చేయగా.. తాను మోసపోయానని గ్రహించాడు. వెంటనే సూర్యవంశీ ప్రకాష్ పోలీసులను ఆశ్రయించాడు. బాధితుడు ఇచ్చిన ఫిర్యాదు మేరకు ఎస్సార్‌నగర్ పోలీసులు చీటింగ్ కేసు నమోదు చేసుకొని కార్తీక్ రెడ్డిని అరెస్టు చేశారు. ఇలాంటి మోసాలు ఇంకా ఏమైనా చేశాడా.. లేక ఇదొక్కటేనా.. అన్న కోణంలో పోలీసులు దర్యాప్తు చేస్తున్నారు.

'సాయి పల్లవి' పాటతో పిల్లలకు టీచర్ పాఠం.. ఎంత బుద్ధిగా వింటున్నారో.. ఐడియా అదుర్స్

• Read More Telangana News And Telugu News