ఇద్దరు సీఎంల బండారం బయటపెడతా.. బండి సంజయ్ సంచలన ఆరోపణ

కృష్ణా జలాలపై సీఎం కేసీఆర్‌ నోరు విప్పాలని తెలంగాణ బీజేపీ అధ్యక్షుడు బండి సంజయ్‌ కుమార్ డిమాండ్ చేశారు. జల వివాదంలో కేంద్ర ప్రభుత్వం తీసుకున్న నిర్ణయాన్ని స్వాగతిస్తున్నామని వెల్లడించారు. కేంద్ర ప్రభుత్వం తీసుకున్న నిర్ణయంతో ఏ ప్రాజెక్టు ఆగబోదని స్పష్టం చేశారు. శుక్రవారం రాజన్న సిరిసిల్ల జిల్లాలో పర్యటించిన బండి సంజయ్ స్థానిక విలేకరులతో మాట్లాడారు. తెలంగాణకు రావాల్సిన నీటి వాట గురించి కేసీఆర్ పట్టించుకోవడం లేదని విమర్శించారు. ఏపీ సీఎం జగన్ యథేచ్ఛగా నీళ్ల దోపిడీకి పాల్పడుతున్నారని ఆరోపించారు. త్వరలో ఇద్దరు సీఎంల బండారం బయట పెడతామని హెచ్చరించారు. రెండు రాష్ట్రాల సీఎంలు కమీషన్ల కోసం పనిచేస్తున్నారని ఆరోపించారు.

రెండు తెలుగు రాష్ట్రాల మధ్య 2015 ఒప్పందం ప్రకారం.. తెలంగాణకి 575 టీఎంసీలు రావాల్సిఉంటే.. ఎందుకు 299 టీఎంసీలకు ఒప్పుకున్నారని బండి సంజయ్‌ ప్రశ్నించారు. అనుమతులు లేకుండా ప్రాజెక్టులు ఎలా నిర్మిస్తున్నారని నిలదీశారు. రాష్ట్రాల మధ్య గొడవలు సృష్టించేందుకు రెండు పార్టీల నేతలు ప్రయత్నిస్తున్నారని ధ్వజమెత్తారు. ఎన్నికల కోసమే ఇద్దరు సీఎంల హైడ్రామా చేస్తున్నారని బండి సంజయ్‌ దుయ్యబట్టారు.