Gangula Kamalakar: మంత్రి గంగుల కమలాకర్‌కు సీబీఐ నోటీసులు.. మరో వ్యవహారంలో చిక్కుకున్న మంత్రి

Minister Gangula Kamalakar: తెలంగాణ మంత్రి గంగుల కమలాకర్ ఇంటికి సీబీఐ అధికారులు చేరుకున్నారు. నకిలీ సీబీఐ అధికారి శ్రీనివాస్ అరెస్ట్ విషయంలో ఆయనకు నోటీసులు అందజేశారు. ఢిల్లీలో గురువారం విచారణకు హాజరుకావాలని ఆదేశించారు. గతంలో ఫేక్ సీబీఐ అధికారి పేరుతో పలువురిని మోసం చేసినందుకు శ్రీనివాస్ అనే వ్యక్తిపై సీబీఐ అధికారులు ఇటీవల కేసు నమోదు చేశారు. ఈ కేసుకి సంబంధించిన వ్యవహారంలో గంగుల నుంచి స్టేట్‌మెంట్ రికార్డు చేసుకునేందుకు కరీంనగర్‌లోని ఆయన ఇంటికి బుధవారం సీబీఐ అధికారులు వెళ్లారు.

ఈ సందర్భంగా నకిలీ సీబీఐ అధికారి శ్రీనివాస్‌కు సంబంధించి మంత్రి గంగుల నుంచి పలు విషయాలు సీబీఐ అధికారులు తెలుసుకున్నారు. గతంలో కాపు సమ్మేళనంలో నకిలీ సీబీఐ అధికారి శ్రీనివాస్.. మంత్రి గంగులను కలిశాడు. మూడు రోజుల క్రితం ఢిల్లీలోని తమిళనాడు భవన్‌లో ఆ నకిలీ సీబీఐ అధికారి శ్రీనివాస్‌ను సీబీఐ అరెస్ట్ చేసింది. సీనియర్ ఐపీఎస్ అధికారుల పేర్లు చెప్పి శ్రీనివాస్ చీటింగ్‌కు పాల్పడుతున్నట్లు గుర్తించారు. ఈ వ్యవహారంలో మంత్రి గంగులకు సీబీఐ అధికారులు నోటీసులు జారీ చేశారు.

గంగులతో పాటు టీఆర్ఎస్ రాజ్యసభ ఎంపీ గాయత్రి రవికి కూడా సీబీఐ అధికారులు నోటీసులు ఇచ్చారు. మంత్రి గంగుల కమలాకర్‌తో శ్రీనివాస్ దిగిన ఫొటోలను సీబీఐ ఇటీవల గుర్తించింది. దీంతో శ్రీనివాస్‌తో గంగుల కమలాకర్‌కు ఉన్న సంబంధాలపై సీబీఐ ఆరా తీయనుందని తెలుస్తోంది. శ్రీనివాస్‌తో గంగుల కమలాకర్‌కు ఎప్పటినుంచి పరిచయం ఉంది..? వీళ్లు ఎప్పుడెప్పుడు కలిశారు..? ఏం మాట్లాడుకున్నారు? అనే విషయాలపై సీబీఐ కూపీ లాగనుందని తెలుస్తోంది. శ్రీనివాస్‌తో గంగులకు సంబంధాలు ఉన్నాయనే అనుమానంతోనే సీబీఐ అధికారులు నోటీసులు ఇచ్చారని, ఇందులో అంతకుమించి ఏమీ లేదని టీఆర్ఎస్ నేతలు చెబుతున్నారు.

సీబీఐ అరెస్ట్ చేసిన శ్రీనివాస్ విశాఖకు చెందిన వ్యక్తి. గంగుల కమలాకర్‌ను ఆయన అసలు ఎందుకు కలిశాడనే వివరాలను సీబీఐ సేకరించనుందని తెలుస్తోంది. ఏదైనా పని కూడా కలిశాడా? లేదా మర్యాదపూర్వకంగానే కలిశాడా? అనే వివరాలపై సీబీఐ ఆరా తీసే అవకాశాలు ఉన్నట్లు తెలుస్తోంది. కాగా ఇటీవల గంగుల కమలాకర్ గ్రానైట్ కంపెనీలపై ఐటీ, ఈడీ దాడులు చేపట్టింది. కరీంనగర్‌లోని గంగుల కమలాకర్ ఇంట్లో కూడా సోదాలు నిర్వహించింది. గంగుల సన్నిహితుల ఇళ్లల్లో కూడా ఒకరోజు పాటు తనిఖీలు చేపట్టింది. ఫెమా నిబంధనలను ఉల్లంఘించారనే ఆరోపణలతో ఐటీ, ఈడీ కలిసి జాయింట్ ఆపరేషన్ ద్వారా కరీంనగర్, హైదరాబాద్‌లలోని పలు ప్రాంతాల్లో సోదాలు నిర్వహించాయి.

Read More Telangana News And Telugu News