Huzurabad: బీజేపీ ఆఫీస్‌లో కూర్చుని.. మరో పార్టీ రావాలంటున్న మాజీ ఎంపీ.. ఆసక్తికర వ్యాఖ్యలు

హుజూరాబాద్ ఉప ఎన్నికలో అనూహ్య పరిణామాలు చోటుచేసుకుంటున్నాయి. కేసీఆర్‌కి వ్యతిరేకంగా ఉన్న శక్తులన్నీ హుజూరాబాద్‌లో ఏకమవుతున్నాయి. గత ఎన్నికలకు ముందే కేసీఆర్‌తో విభేదించి పార్టీ నుంచి బయటికొచ్చేసిన టీఆర్‌ఎస్ మాజీ ఎంపీ కొండా విశ్వేశ్వర్ రెడ్డి కాంగ్రెస్‌లో చేరారు. చేవెళ్ల పార్లమెంట్ స్థానం నుంచి రెండోసారి పోటీ చేసి టీఆర్‌ఎస్ అభ్యర్ధి చేతిలో ఓటమి పాలయ్యారు. ఆ తర్వాత కాంగ్రెస్ పార్టీ నుంచి కూడా బయటికి వచ్చేసిన ఆయన స్వతంత్రంగానే ఉంటున్నారు. తెలంగాణకు ఏది మంచిదైతే అదే చేస్తానంటూ మాజీ మంత్రి ఈటల రాజేందర్‌కి బహిరంగంగానే మద్దతు ప్రకటించారు.

ఈటలకి మద్దతుగా హుజూరాబాద్‌లో ప్రత్యేకంగా ప్రచారం కూడా చేశారు. హుజూరాబాద్ ప్రజలకు లేఖ రాసి తన సొంత టీంతో ఇంటింటికీ పంపిణీ చేయించారు. తాజాగా హుజూరాబాద్ నియోజకవర్గంలోని జమ్మికుంట విచ్చేసిన ఆయన షాకింగ్ కామెంట్స్ చేశారు. తెలంగాణ సాధించుకోవడం కోసం టీఆర్ఎస్‌లోకి వెళ్లామని.. నియంత పాలన భరించలేక బయటికొచ్చేశామని విశ్వేశ్వర్ రెడ్డి అన్నారు. ఈటలపై లేనిపోని నిందలు మోపి బయటకు పంపించారని ఆయన విమర్శించారు.

ఈటల రాజేందర్ హుజూరాబాద్‌లో గెలవాలని.. కేసీఆర్‌ను గద్దె దించాలని తెలంగాణ ఉద్యమకారులందరూ కోరుకుంటున్నారని కొండా విశ్వేశ్వర్ రెడ్డి అన్నారు. తెలంగాణ రాష్ట్రంలో మరో ప్రాంతీయ పార్టీ రావాల్సిన అవసరం ఉందని మాజీ ఎంపీ అభిప్రాయపడ్డారు. రాష్ట్రంలో మరో పార్టీ ఉంటేనే కేసీఆర్‌కి తగిన గుణపాఠం జరుగుతుందన్నారు. జాతీయ పార్టీలు కాకుండా రాష్ట్రంలోనే మరో పార్టీ ఉండాలని ఆయన అన్నారు. అయితే ఇదంతా జమ్మికుంట బీజేపీ కార్యాలయంలో ఏర్పాటు చేసిన మీడియా సమావేశంలో కావడం విశేషం. జాతీయ పార్టీ కార్యాలయంలో కూర్చుని మరో పార్టీ రావాలని మాజీ ఎంపీ చేసిన వ్యాఖ్యలు ఆసక్తికరంగా మారాయి.



Also Read: