నా హత్యకు ఓ మంత్రి కుట్ర... ఈటల సంచలన వ్యాఖ్యలు

మాజీ మంత్రి, బీజేపీ నేత ఈటల రాజేందర్ మరోసారి సంచలన వ్యాఖ్యలు చేశారు. తన హత్యకు ఓ మంత్రి కుట్ర చేస్తున్నారంటూ ఆయన కీలక వ్యాఖ్యలు చేశారు. కరీంనగర్‌కు చెందిన మంత్రి ప్రయత్నాలు చేస్తున్నారని ఆరోపించారు . ఇందుకు సంబంధించి కచ్చితమైన సమాచారం తనకు వచ్చిందని వెల్లడించాడు . పాదయాత్ర ప్రారంభించిన సందర్భంగా ఈటల చేసిన ప్రసంగం ఇప్పుడు సంచలనం రేకెత్తిస్తోంది. అంతేకాకుండా తాను ఎలాంటి బెదిరింపులకు భయపడేది లేదని, తాను పాదయాత్ర కోసం అనుమతి తీసుకున్నప్పటికీ అడ్డంకులు సృష్టిస్తున్నారని ఆవేదన వ్యక్తం చేశాడు. తనకు చట్టంపై నమ్మకముందని పోలీసులకు సహకరించాలని కోరారు.

కెసిఆర్ రజాకార్ల రాజ్యం చేశారంటూ మండిపడ్డారు. దళిత బందు ప్రవేశ పెట్టినందుకు సంతోషమన్నారు. దళితుల సంక్షేమ కోసం ప్రభుత్వం ఏం చేయలేదని విమర్శించారు. ఎన్నికల కోసం పథకాలు తీసుకు రావద్దన్నారు. రెండేళ్లుగా ఇవ్వని పెన్షన్, రేషన్ కార్డ్ ఇస్తున్నారని ఆరోపించారు. ఫాంహౌస్‌లో ఉన్న కేసీఆర్‌ను ప్రజల మధ్యకు తీసుకువచ్చినది మనమే అన్నారు. అన్నం పెట్టుకోడానికి తెచ్చుకున్న సామానులు కూడా తాళం వేశారు, ఇదేం సంస్కృతి అంటూ ఈటల మండిపడ్డారు.

తనను చంపడానికి జిల్లా మంత్రి కుట్ర చేస్తున్నాడని కీలక వ్యాఖ్యలు చేశారు ఈటల. హంతక ముఠాతో చేతులు కలిపారని తనకు సమాచారం వచ్చిందన్నారు. ‘అరె కొడకల్లారా! నరహంతకుడు నయిం చంపుతా అంటేనే భయపడలేదు. ఈ చిల్లర ప్రయత్నాలకు ఈనాడు కూడా భయపడం’ అంటూ ఈటల మాట్లాడుతూ కీలక వ్యాఖ్యలు చేశారు. దుబ్బాక లో ఎం జరిగిందో అదే హుజూరాబాద్‌లో కూడా జరుగుతుందని జోస్యం చెప్పారు ఈటల.