మీ నాన్నఎవర్ని కలిసినా తప్పులేదు.. మేం కలిస్తే తప్పా?: కేటీఆర్‌కు ఈటల కౌంటర్

హుజూరాబాద్‌ ఉపఎన్నికల్లో బీజేపీ, కాంగ్రెస్ పార్టీ కుమ్మక్కయ్యాయంటూ మంత్రి కేటీఆర్ చేసిన వ్యాఖ్యలు రాజకీయ వర్గాల్లో హాట్‌టాపిక్‌గా మారాయి. ఈ వ్యవహారంలో కేటీఆర్‌పై బీజేపీ, కాంగ్రెస్ నేతలు మండిపడుతున్నారు. కేటీఆర్ వ్యాఖ్యలపై తాజాగా ఈటల రాజేందర్ స్పందించారు. శనివారం హుజురాబాద్ నియోజకవర్గంలో ఎన్నికల ప్రచారంలో పాల్గొన్న ఈటల మాట్లాడుతూ... తాను రేవంత్ రెడ్డిని కలిసిన మాట వాస్తవమేనన్నారు. టీఆర్ఎస్ నుంచి బయటకు వచ్చిన తర్వాత 4 నెలల క్రితం రేవంత్ రెడ్డిని కలిశానని తెలిపారు. తాను రేవంత్‌ని కలిస్తే తప్పేంటని ప్రశ్నించారు.టీఆర్ఎస్ నుంచి బయటికొచ్చిన తర్వాత తాను అన్ని పార్టీల నాయకులను కలిశానని ఈటల తెలిపారు. తెలంగాణ ఉద్యమ సమయంలో కేసీఆర్ అన్ని పార్టీల మద్దతు కూడగట్టలేదా?.. అప్పుడు జాతీయ పార్టీల నేతలను కలవలేదా? అని నిలదీశారు. కేసీఆర్ సీఎం అయ్యాకే ఇతర పార్టీల నాయకులను కలవకూడదనే కుసంస్కారం మొదలైందని విమర్శించారు.