నేను మంత్రి పదవిలో ఉండొచ్చు.. మరో పదవిలో ఉండొచ్చు.. ఈటల ఆసక్తికర వ్యాఖ్యలు

తెలంగాణ వైద్యారోగ్య శాఖ మంత్రి ఈటల రాజేందర్ మరోసారి ఆసక్తికర వ్యాఖ్యలు చేశారు. తాను మంత్రి పదవిలో ఉండొచ్చు.. మరో పదవిలో ఉండొచ్చు కానీ రైతు ఉద్యమం ఎక్కడున్నా తన మద్దతు ఎప్పుడూ వారికి ఉంటుందన్నారు. కరీంనగర్ జిల్లా వీణవంక మండలం చల్లూరులో రైతు వేదికను ప్రారంభించిన సందర్భంగా ఈటల చేసిన ఈ వ్యాఖ్యలు ప్రాధాన్యం సంతరించుకున్నాయి.

‘‘ఈ దేశంలో ఇద్దరు మాత్రమే త్యాగమూర్తులు.. ఒకరు దేశం కోసం రక్తం ధారబోసి భరతమాతను కాపాడుతున్న జవాన్.. మరొకరు రక్తాన్ని చెమటగా మార్చి దేశానికి సౌభాగ్యం అందించే రైతు. అలాంటి రైతును ఏడిపించడం ఎవరికీ మంచిది కాదు’’ అని ఈటల వ్యాఖ్యానించారు. తానెప్పుడూ ప్రలోభాలకు గురి చేసి ఓటు అడగలేదన్నారు. తనకు 20 ఏళ్లపాటు ఆరుసార్లు ప్రజలు తనకు ఓటేశారన్న ఈటల.. నేనే మీకు రుణపడి ఉంటానన్నారు. మీకు మచ్చ తెచ్చే పనులు ఎప్పుడూ చేయనన్నారు. పదవులు ఉంటయి పోతయి.. కానీ మానవ సంబంధాలు ముఖ్యమని ఈటల వ్యాఖ్యానించారు.

తెలంగాణ సీఎం పగ్గాలను త్వరలోనే కేటీఆర్‌కు అప్పగిస్తారని ప్రచారం జరుగుతున్న వేళ.. తాను మంత్రి పదవిలో ఉండొచ్చు ఉండకపోవచ్చంటూ.. ఈటల చేసిన వ్యాఖ్యలు రాజకీయంగా ప్రాధాన్యం సంతరించుకున్నాయి.