KCR చిన్ననాటి స్నేహితుడు మృతి.. సరిగ్గా ఏడాది క్రితం సర్‌ప్రైజ్ చేసిన సీఎం!

సీఎం కేసీఆర్ చిన్ననాటి స్నేహితుడు సంపత్ కుమార్ ఇక లేరు. కరీంనగర్‌ జిల్లా మానకొండూర్‌ మండలం కొండపల్కలకు చెందిన తిరునగరి సంపత్‌కుమార్‌ బుధవారం రాత్రి గుండెపోటుతో కన్నుమూశారు. కేసీఆర్, సంపత్‌కుమార్‌ చదువుకునే రోజుల్లో మంచి మిత్రులు, ఇద్దరూ ఒకే గదిలో ఉండేవారు. గత ఏడాది ఫిబ్రవరిలో కేసీఆర్ కాళేశ్వరం ప్రాజెక్ట్ సందర్శనకు వెళ్లిన సమయంలో సంపత్‌ను ఆత్మీయంగా ఆలింగనం చేసుకున్నారు.

హెలిప్యాడ్ నుంచి నడుచుకుంటూ వెళ్లే సమయంలో సంపత్ కుమార్‌ను గుర్తించిన కేసీఆర్.. సెక్యూరిటీ సిబ్బంది ఆయన్ను తన దగ్గరకు రానివ్వకపోవడాన్ని గమనించారు. ఏయ్ సంపత్ ఇట్రా.. ఆయన మా దోస్తయ్యా.. ఆయన్ను జర రానీయిండ్రీ అంటూ సెక్యూరిటీ సిబ్బందికి సీఎం సూచించారు.

తన దగ్గరకు వచ్చిన సంపత్‌ను ఆత్మీయంగా ఆలింగనం చేసుకున్న కేసీఆర్.. తనతోపాటు ఉన్న మంత్రులు, అధికారులు, ఇతర ప్రజాప్రతినిధులకు సంపత్‌ను పరిచయం చేశారు. తన మిత్రుడైన కేసీఆర్‌తో కలిసి నడిచే వేళ.. ఆయన కళ్లలో కనిపించిన ఆనందాన్ని మాటల్లో వర్ణించలేం.

‘‘స్కూలుకు పోయేటప్పుడు మేమిద్దరం కలిసి తిరిగినం.. ఆడుకున్నం.. ముచ్చట్లు జెప్పుకొనేటోల్లం.. ఇప్పుడా దోస్తు అందనంత ఎత్తుకు ఎదిగిండు.. మేమిద్దరం హైదరాబాద్‌లో సదువుకునేటప్పుడు ఒకే గదిల ఉండేటోళ్లం’’ అంటూ సంపత్ కుమార్ తమ చిన్నప్పటి స్మృతులను అప్పట్లో నెమరేసుకున్నారు. కాగా, సంపత్‌కుమార్‌ అవివాహితుడు కావడంతో ఆయన సోదరుడు అంత్యక్రియలు నిర్వహించారు.