అత్తమామకి అల్లుడు చులకన.. కూతురికి నూరిపోసి.. చివరికి..

కాయకష్టం చేసుకునే అల్లుడు అత్తమామలకి రుచించలేదు. నీకేముందంటూ సూటిపోటి మాటలతో రాచిరంపాన పెట్టారు. ఉన్నవీ లేనివీ నూరిపోసి కన్నకూతురి కాపురంలో నిప్పులు పోశారు. చివరికి ప్రేమించి పెళ్లి చేసుకున్న భార్య కనీసం విలువివ్వడం మానేసింది. ఆస్తిపాస్తులు లేవంటూ చులకన చేసి మాట్లాడుతుండడంతో తీవ్ర మనస్థాపానికి గురైన అల్లుడు దారుణ నిర్ణయం తీసుకున్నాడు. తిరిగిరాని లోకాలకు వెళ్లిపోయాడు. ఈ విషాద ఘటన జగిత్యాల జిల్లాలో జరిగింది.

ఆదిలాబాద్ జిల్లాకి చెందిన రుద్ర(28)కి జయశ్రీ అనే యువతితో పరిచయమైంది. ఆ పరిచయం ప్రేమగా మారి ఇద్దరూ ఎనిమిది నెలల కిందట పెళ్లి చేసుకున్నారు. గత నెలలో జగిత్యాల జిల్లా గోధూర్ గ్రామ శివారులోని మంతె మహేందర్ కోళ్లఫారంలో పనికి కుదిరారు. ఇంతలో అత్తమామల రూపంలో ఊహించని కష్టమొచ్చిపడింది. కూతురిని చూసేందుకు వచ్చిన అత్తమామలు వినోద్ కుమార్, చంద్రబాను ఆస్తిపాస్తుల్లేవంటూ అల్లుడిని చులకనగా మాట్లాడేవారు. అమ్మాయిని సరిగ్గా చూసుకోవడం లేదంటూ వాదనకు దిగేవారు.

లేనిపోని మాటలు చెప్పి కూతురి కాపురంలో నిప్పులు పోశారు. తల్లిదండ్రుల మాటలు విన్న కూతురు భర్తతో గొడవపడే వరకూ వెళ్లింది. తనను కాదని ఆమె పుట్టింటికి వెళ్లిపోవడంతో రుద్ర మానసికంగా కుంగిపోయాడు. కోళ్లఫారంలోనే ఉరేసుకుని ఆత్మహత్య చేసుకున్నాడు. తన చావుకి భార్య, అత్తమామలే కారణమని సూసైడ్ నోట్ రాసి పెట్టినట్లు తెలుస్తోంది. పోలీసులు కేసు నమోదు చేసుకుని దర్యాప్తు చేస్తున్నారు.

Also Read: