Lady Barber: కుటుంబ పోషణ కోసం బార్బర్‌గా మారిన యువతి.. ఆమె తెగువకు హ్యాట్సాాఫ్

నవమాసాలు మోసి జన్మనిచ్చిన తల్లి తన చిన్నప్పుడే అనారోగ్యంతో చనిపోయింది. తండ్రి బ్రెయిన్ ట్యూమర్‌తో మంచాన పడ్డాడు. ఇద్దరు అక్కలకి పెళ్లిళ్లు అయ్యాయి. దీంతో కుటుంబానికి తానే పెద్ద దిక్కయింది. ఓ వైపు చదువుకుంటూనే కుటుంబ పోషణ కోసం తన కులవృత్తినే నమ్ముకుంది. పుస్తకం పట్టిన చేత్తోనే కత్తెర పట్టి క్షవరం చేస్తోంది. భద్రాద్రి కొత్తగూడెం జిల్లా(Bhadradri kothagudem)కు చెందిన బిందు ప్రియ దీనగాథ ఇది.
Indian Railway: ఐటీ నగరాల మధ్య హైస్పీడ్ రైల్.. హైదరాబాద్ నుంచి బెంగళూరుకు 3 గంటలే ప్రయాణం
భద్రాద్రి కొత్తగూడెం జిల్లా అశ్వాపురం(Awapuram) మండలం మొండికుంట గ్రామానికి చెందిన మేడిపల్లి రాజయ్య, స్వరూప దంపతులకు ముగ్గురు అమ్మాయిలు సంతానం. ఇద్దరు అమ్మాయిలకు వివాహాలు కాగా.. చిన్నమ్మాయి బిందు ప్రియ డిగ్రీ చదువుతోంది. స్వరూప కూలిపనులకు వెళ్తుండగా.. రాజయ్య స్వగ్రామంలోనే సెలూన్ పెట్టుకుని తన కులవృత్తిని కొనసాగించేవాడు. ఉన్నంతలో హాయిగా సాగిపోతున్న ఆ కుటుంబంతో కష్టాలు మొదలయ్యాయి. కొద్దినెలల క్రితం బ్రెయిన్‌ ట్యూమర్ రావడంతో రాజయ్య మంచాన పడ్డాడు. దీంతో స్వరూప సంపాదించే కూలి డబ్బులతోనే ఆ కుటుంబం నడవసాగింది. అయితే కొంతకాలానికి స్వరూప అనారోగ్యంగా కన్నుమూయడంతో ఆ కుటుంబం కష్టాలు రెట్టింపయ్యాయి.

కలెక్టర్ కావాలని కోరిక

ఓ పక్క తల్లి మృతి.. మరోపక్క మంచాన పడ్డ తండ్రి.. అయినా బిందు ప్రియ కుంగిపోలేదు. కుటుంబ భారాన్ని తన భుజానికెత్తుకుంది. తండ్రి నిర్వహించే బార్బర్‌ షాపుకెళ్లి తానే కులవృత్తిని చేపట్టింది. సెలూన్‌కి వచ్చేవారికి షేవింగ్, కటింగ్ చేస్తూ వచ్చే ఆదాయంతో తండ్రిని కంటికి రెప్పలా చూసుకుంటోంది. ఆ అమ్మాయి తెగువను చూసిన గ్రామస్తులు ప్రశంసలతో ముంచెత్తుతున్నారు. తనకు చిన్నప్పటి నుంచి కలెక్టర్ కావాలని కోరిక ఉండేదని.. అయితే కుటుంబ పరిస్థితుల కారణంగా తప్పనిసరై కులవృత్తి చేపట్టాల్సి వచ్చిందని బిందు ప్రియ చెబుతోంది. పూర్తి సమయంలో సెలూన్‌కే కేటాయిస్తుండటంతో చదవలేకపోతున్నానని ఆవేదన వ్యక్తం చేస్తోంది. ఎవరైనా తనకు సాయం చేస్తే తన జీవిత లక్ష్యాన్ని సాధిస్తానని చెబుతోంది.