Aswaraopeta: అశ్వారావుపేట 'కారు'లో అసంతృప్తి సెగలు..!

Aswaraopeta: ఖమ్మం జిల్లా రాజకీయాలు వేడెక్కాయి. ఎన్నికలు సమీపిస్తున్న తరుణంలో.. మళ్లీ తామే గెలిచేలా నేతలు ఎవరికి వారు వ్యూహాలు రచిస్తున్నారు. ఈసారి ఖమ్మం (Khammam) జిల్లాలో అన్ని అసెంబ్లీ స్థానాలు గెలవాలని టీఆర్ఎస్ పట్టుదలగా ఉంది. అందుకే మంత్రి కేటీఆర్ స్వయంగా ఖమ్మంపై ఫోకస్ పెట్టారు. వేరే నియోజకవర్గాల పరిస్థితి ఎలా ఉన్నా.. అశ్వారావుపేట మాత్రం టీఆర్ఎస్ (TRS) పార్టీకి తలనొప్పిగా మారింది. అక్కడి ఎమ్మెల్యే తీరుపై సొంత పార్టీ నేతలో గుర్రుగా ఉన్నారు. ఆయన తమను పట్టించుకోవడం లేదని ఆరోపిస్తున్నారు. 2014 ఎన్నికల్లో అశ్వారావుపేట నుంచి తాటి వెంకటేశ్వర్లు వైసీపీ అభ్యర్థిగా పోటీ చేసి గెలిచారు. ఆ తర్వాత అప్పటి ఖమ్మం ఎంపీ పొంగులేటి శ్రీనివాస్ రెడ్డితో కలిసి అధికార టీఆర్ఎస్ పార్టీలో చేరారు. 2018 ఎన్నికల్లో టీఆర్ఎస్ నుంచి పోటీ చేసినా.. టీడీపీ అభ్యర్థి మెచ్చా నాగేశ్వర రావు (Mecha Nageswara Rao) చేతిలో ఓడిపోయారు. ఆ తర్వాత జరిగిన రాజకీయ పరిణామాలతో మెచ్చా కూడా కారెక్కారు. అప్పటి నుంచి మెచ్చా, తాటి మధ్య విభేదాలు రాజుకున్నాయి. ఇరు వర్గాల నేతలు బహిరంగంగానే విమర్శలు గుప్పించుకున్నారు. ఆ వర్గపోరు కాస్త.. పార్టీలు మారే వరకు వెళ్లింది.

తనకు పార్టీలో సరైన ప్రాధాన్యత లేదని.. తాటి వెంకటేశ్వర్లు (thati Venkateswarlu) చాలాసార్లు బహిరంగంగానే వ్యాఖ్యానించారు. మంత్రి కేటీఆర్, పొంగులేటి శ్రీనివాస్ రెడ్డికి చాలాసార్లు ఈ విషయాన్ని చెప్పారు. అయినా పరిస్థితుల్లో మార్పు లేకపోవడంతో.. తాటి వెంకటేశ్వర్లు టీఆర్ఎస్ పార్టీకి రాజీనామా చేశారు. గాంధీభవన్‌లో టీపీసీసీ చీఫ్ రేవంత్ రెడ్డి సమక్షంలో కాంగ్రెస్ (Congress) పార్టీలో చేరారు. అప్పటితో సమస్య పరిష్కారం అయ్యిందని అంతా భావించారు. సమస్య పరిష్కారం కాకపోగా.. కొత్త ప్రాబ్లం వచ్చిపడింది. ఈసారి ఏకంగా నాయకులు, కార్యకర్తలు మెచ్చాపై ఆగ్రహం వ్యక్తం చేస్తున్నారు.

ఎప్పటినుంచో పార్టీలో ఉన్న తమకు కాకుండా.. టీడీపీ (TDP) కార్యకర్తలకు మెచ్చా నాగేశ్వర రావు ప్రాధాన్యత ఇస్తున్నారని.. గులాబీ నేతలు గుర్రుగా ఉన్నారు. నియోజకవర్గ అభివృద్ధిని అస్సలు పట్టించుకోవడం లేదని ఆరోపిస్తున్నారు. ఏ సమస్యలు చెప్పుకుందామన్నా.. మెచ్చా తమకు అందుబాటులో ఉండరని అంటున్నారు. ఈ విషయాన్ని పార్టీ పెద్దల దృష్టికి తీసుకెళ్లినా.. ఫలితం లేదని వాపోతున్నారు. పరిస్థితి ఇలానే ఉంటే.. రాబోయే ఎన్నికల్లో నష్టం తప్పదని స్పష్టం చేస్తున్నారు. అయితే.. మెచ్చా (Mecha Nageswara Rao) మాత్రం ఇలాంటి కామెంట్స్‌ను లైట్‌గా తీసుకుంటున్నారు. ఎవరేం చేసినా.. మళ్లీ గెలుపు తనదేనని స్పష్టం చేస్తున్నారు.