Snehalatha IAS: సర్కార్ దవాఖానలో కలెక్టరమ్మ ప్రసవం.. యువ ఐఏఎస్, ఐపీఎస్ జంట ఆదర్శం

ఈరోజుల్లో చిన్న ప్రభుత్వ ఉద్యోగి అయితేనే ఆ హంగూ ఆర్భాటం మామూలుగా ఉండడం లేదు. ఇక ఉన్నత స్థానాల్లో ఉండే వారికైతే పెద్ద పెద్ద బంగ్లాలు, నౌకర్లు, రాచమర్యాదలు షరామామూలే. జలుబు చేసినా కార్పొరేట్ ఆస్పత్రికి వెళ్లే ఆఫీసర్లు ఎందరో. కానీ ఆమె ఓ జిల్లాకు అడిషనల్ కలెక్టర్. భర్త ఐపీఎస్ అధికారి. అయినప్పటికీ అతి సామాన్యురాలిలా ప్రభుత్వ ఆస్పత్రికి వెళ్లారు. తల్లి కాబోతున్న ఆమె అక్కడే అన్ని పరీక్షలు చేయించుకుని ప్రసవానికి సిద్ధమయ్యారు. పండంటి ఆడబిడ్డకు జన్మనిచ్చారు. ఏకంగా కలెక్టరమ్మే సర్కారు దవాఖానలో ఆపరేషన్ చేయించుకుందని తెలిసిన ప్రజానీకం ఆదర్శ జంట అంటూ దంపతులపై ప్రశంసలు కురిపిస్తున్నారు. ఖమ్మం అడిషనల్ కలెక్టర్ స్నేహలత,

ఖమ్మం జిల్లా అడిషనల్ కలెక్టర్ స్నేహలతో ప్రభుత్వాస్పత్రిలో ప్రసవం చేయించుకుని అందరికీ ఆదర్శంగా నిలిచారు. పురిటి నొప్పులు రావడంతో ఖమ్మం ప్రభుత్వం ఆస్పత్రికి వచ్చిన స్నేహలత.. అక్కడే వైద్య పరీక్షలు చేయించుకున్నారు. వైద్యులు ఆపరేషన్ చేయాలని చెప్పడంతో డెలివరీకి సిద్ధమయ్యారు. ఆపరేషన్ అనంతరం పండంటి ఆడబిడ్డకు ఆమె జన్మనిచ్చారు. హోదా, అధికారం ఉన్నప్పటికీ సామాన్యురాలిలా కలెక్టరమ్మ ప్రభుత్వ ఆస్పత్రిలో ప్రసవం చేయించుకోవడం హాట్‌టాపిక్‌గా మారింది. ఆమె భర్త శబరీష్ ఐపీఎస్. మణుగూరు ఏఎస్పీగా పనిచేస్తున్నారు. ఆలోచనలే కాదు.. ఆచరణలోనూ ఆదర్శంగా నిలిచిన యువ ఐఏఎస్, ఐపీఎస్ జంటపై ప్రశంసల జల్లు కురుస్తోంది.

అడిషనల్ కలెక్టర్ ప్రసవం విషయం తెలుసుకున్న జిల్లా మంత్రి పువ్వాడ అజయ్ కుమార్ ఈరోజు ఆస్పత్రికి వెళ్లి స్నేహలత దంపతులను పలకరించారు. ప్రభుత్వ ఆస్పత్రిలో ప్రసవం చేయించుకున్నందుకు ఆదర్శ జంటకు అభినందనలు తెలిపారు. పాపను చేతుల్లోకి తీసుకుని కొద్దిసేపు లాలించారు. ప్రభుత్వ ఆస్పత్రులపై మరింత గౌరవం పెంచారని ప్రశంసించారు. ఆయన వెంట ఖమ్మం మేయర్ నీరజ, డీఎంహెచ్‌వో మాలతి తదితరులు ఉన్నారు.

Also Read: