Khammam: నారా బ్రాహ్మణిపై అసభ్యకర పోస్టు.. ఆర్‌ఎంపీని చితకబాదిన టీడీపీ నేతలు

సోషల్ మీడియాలో నారా బ్రాహ్మణిపై (Nara Brahmani) అసభ్యకర పోస్టులు పెట్టిన ఓ వ్యక్తిని ఖమ్మంలో స్థానిక టీడీపీ నేతలు పట్టుకొని చితకబాదారు. ఆంధ్రప్రదేశ్‌లోని కృష్ణా జిల్లాకు చెందిన నరసింహ అనే వ్యక్తి ఖమ్మం జిల్లా టేకులపల్లిలో ఆర్‌ఎంపీగా పనిచేస్తున్నారు. తన ఫేస్‌బుక్‌ అకౌంట్లో టీడీపీ అధినేత నారా చంద్రబాబు నాయుడు కోడలు బ్రాహ్మణిపై అసభ్య పదజాలంతో పోస్టులు పెట్టినట్లు టీడీపీ నేతలు చెబుతున్నారు. వ్యక్తిగతంగా కించపరిచేలా వ్యాఖ్యలు చేసినట్లు ఆరోపిస్తున్నారు. ఆ పోస్టులను గమనించిన స్థానిక టీడీపీ నాయకులు కేతినేని హరీశ్‌, రంజిత్‌, నున్నా నవీన్‌, వక్కంతుల వంశీ తదితరులు ఆర్‌ఎంపీకి ఫోన్ చేసి ప్రశ్నించారు. అతడు ముస్తఫానగర్‌‌లో వైఎస్సార్ తెలంగాణ పార్టీ ఆఫీసులో ఉన్నట్లు చెప్పడంతో.. అక్కడికి వచ్చి పోస్టుల గురించి ప్రశ్నించారు. అనంతరం అతడిని అక్కడే చితకబాదారు.

పోస్టుల గురించి అడిగితే, దురుసుగా సమాధానం చెప్పాడని టీడీపీ నేతలు చెబుతున్నారు. దీంతో ఆగ్రహానికి గురై దాడి చేసినట్లు వెల్లడించారు. నారా, నందమూరి కుటుంబాలకు చెందిన వ్యక్తులపై అసభ్య పదజాలంతో వ్యక్తిగతంగా దూషిస్తే చూస్తూ ఊరుకోమని టీడీపీ నేతలు హెచ్చరించారు..