పాములు పట్టడం అతడికి వెన్నెతో పెట్టిన విద్య.. కానీ ఆ ఒక్క పొరపాటుతో..!

పాములను కాపాడటమే హాబీగా పెట్టుకున్న అతడు.. జనవాసాల్లోకి వచ్చిన వాటిని చాకచక్యంగా పట్టుకొని అటవీ ప్రాంతంలో వదిలేసే వాడు. 12 ఏళ్లుగా ఈ పనిచేస్తున్న అతడు.. దురదృష్టవశాత్తూ చివరికి ఆ పాము కాటుకే బలయ్యాడు. భద్రాద్రి కొత్తగూడెం జిల్లాలో ఈ విషాద సంఘటన చోటు చేసుకుంది.

వివరాల్లోకి వెళ్తే.. మణుగూరు మండలం సమితి సింగారానికి చెందిన షరీఫ్ (31) ఎలక్ట్రీషియన్‌గా పనిచేస్తుంటాడు. అయితే పాములు పట్టడం నేర్చుకున్న షరీఫ్ దాదాపు 12 ఏళ్లుగా ఆ చుట్టుపక్కల ఎవరి ఇంట్లోకి పాము వచ్చినా.. ఆ పామును పట్టుకుని అడవిలో వదిలేశావాడు. తాజాగా రిక్షా కాలనీకి చెందిన బానోత్‌ వెంకట్రావ్‌ ఇంట్లోని బావిలో మంగళవారం తాచు పాము కనిపించగా.. షరీఫ్‌ దాన్ని పట్టుకునే ప్రయత్నం చేశాడు. ఈ క్రమంలో అతని చేతిపై పాము కాటేసింది.

గోవాలో హైదరాబాదీ మిస్సింగ్.. శరీరంపై కుట్లతో 10 రోజుల తర్వాత ఇంటికి.. మిస్టరీగా..
అయినప్పటికీ వెంటనే ఆస్పత్రికి వెళ్లకుండా.. గంటకుపైగా ఆ పామును ఆడించాడు. ఆ తర్వాత పామును బస్తాలో తీసుకెళ్లి అడవిలో వదిలివేసి తిరిగి వస్తుండగా సురక్షా బస్టాండ్‌ దగ్గర కింద పడిపోయాడు. స్థానికులు ఆటోలో ఆస్పత్రికి తరలించగా.. అప్పటికే ప్రాణాలు కోల్పోయినట్టు వైద్యులు నిర్ధారించారు. మృతుడి తల్లి కమరున్నీసా బేగం ఫిర్యాదుతో కేసు నమోదు చేసినట్లు మణుగూరు పోలీసులు తెలిపారు. పాములను చాకచక్యంగా పట్టే షరీఫ్‌ అదే పాము కాటుకు మృతి చెందడం స్థానికంగా విషాదం నింపింది. పాము కాటు వేయగానే ఆస్పత్రికి వెళ్లాలని సూచించినా షరీఫ్‌ పట్టించుకోలేదని.. ముందే వెళ్లుంటే బతికేవాడని స్థానికులు చెబుతున్నారు.