కోడలికి మామ మద్దతు.. శవాన్ని కూడా తాకొద్దంటూ కొడుకు సుసైడ్ నోట్

కొడుకు కాపురం చక్కదిద్దాలనుకున్నాడు. అందుకే కోడలి రమ్మంటే పోలీస్ స్టేషన్‌కు వెళ్లాడు. అదే అతను చేసిన తప్పైంది. కన్నతండ్రే తనకు వ్యతిరేకంగా కోడలికి మద్దతు ఇచ్చాడన్న మనస్తాపంతో కొడుకు ఆత్మహత్య చేసుకున్నాడు. ఈ ఘటన భద్రాద్రి కొత్తగూడెం జిల్లాలో జరిగింది. పాల్వంచ మండలం నాగారం గ్రామానికి చెందిన ఐలపాక పవన్ కళ్యాణ్‌కు సత్తుపల్లికి చెందిన రామకృష్ణవేణితో అయిదేళ్ల క్రితం పెళ్లైంది. వీరికి నాలుగేళ్ల పాప కూడా ఉంది. పెళ్లయిన ఏడాదికే ఇద్దరి మధ్య గొడవలు రావడంతో భార్య రామకృష్ణవేణి బిడ్డతో కలిసి పుట్టింటికి వెళ్లింది.

అయితే గత నెల 14న అత్త బుల్లెమ్మ గుండెపోటుతో మరణించడంతో అంత్యక్రియలు, కర్మకాండలకు రామకృష్ణవేణి హాజరైంది. ఈ సందర్భంగా గొడవలు మర్చిపోయి హాయిగా జీవిద్దామని భర్త పవన్‌కు నచ్చజెప్పే ప్రయత్నం చేసింది. అయినా అతడు వినకపోవడంతో మామతో కలిసి ఇటీవల పోలీసులను ఆశ్రయించింది. మీరైనా నచ్చజెప్పి తన కాపురాన్ని నిలబెట్టాలని వేడుకుని పుట్టింటికి వెళ్లిపోయింది. తనకు వ్యతిరేకంగా తండ్రే పోలీసులకు ఫిర్యాదు చేశాడన్న మనస్తాపంతో పవన్‌ కళ్యాణ్‌ గురువారం సాయంత్రం ఇంట్లో ఎవరూ లేని సమయంలో ఉరేసుకుని ఆత్మహత్యకు పాల్పడ్డాడు.

Read More: భూమా అఖిల ప్రియకు మద్దతు ఇస్తూ బీజేపీ నేత సంచలన వ్యాఖ్యలు

అయితే చనిపోయే ముందు సూసైడ్ నోటు కూడా రాశాడు పవన్. ‘నా శవాన్ని మా నాన్న, భార్య ముట్టుకోవడానికీ వీల్లేదు. నాన్నమ్మ, తాతయ్యలే అంత్యక్రియలు, కర్మ క్రతువులు జరిపించాలని’ లేఖ రాశాడు. ఈ లేఖ పోలీసులకు లభ్యమైంది. తన కుమారుడి చివరి కోరిక మేరకు దహన సంస్కారాలకు తండ్రి దూరంగానే ఉన్నాడు. నాన్నమ్మ తాతయ్యలే దగ్గరుండి అంత్యక్రియలు తంతు ముగించారు.