దొంగోడి డెడికేషన్.. బేడీతో స్టేషన్ నుంచి తప్పించుకొని వచ్చి మరీ చోరీ.. కాసేపటికే సీన్ రివర్స్!

తిరగనేర్చిన కాలు ఇంట్లో నిలవదంటారు కదా.. అలాగే దొంగతనాలకు అలవాటైన ప్రాణం కూడా ఊరుకోదేమో. అందుకే కావచ్చు ఓ దొంగ పోలీసు స్టేషన్లో నుంచి తప్పించుకోని రాగానే చోరీకి యత్నించాడు. కానీ స్థానికులు అప్రమత్తం కావడం.. సోషల్ మీడియా పుణ్యమా అని కాసేపట్లోనే దొరికిపోయాడు. చివరికి మళ్లీ పోలీసు స్టేషన్‌కే చేరాడు. ఖమ్మం జిల్లా నేలకొండపల్లిలో చోటు చేసుకున్న ఈ ఘటన వివరాల్లోకి వెళ్తే..

నేలకొండపల్లికి చెందిన కాశిబోయిన గణపతి ఇటీవల పలు బైకులను దొంగిలించాడు. దీంతో నేలకొండపల్లి పోలీసులు నాలుగు రోజుల క్రితం అతణ్ని అదుపులోకి తీసుకున్నారు. కాగా బుధవారం సాయంత్రం స్టేషన్ నుంచి పరారైన గణపతి.. కూసుమంచి మండలం నాయకన్‌గూడెం వెళ్లాడు. అ గ్రామ సర్పంచ్ కుమారుడి పెళ్లి జరుగుతుండటంతో చాలా మంది అతిథులు అక్కడికి వచ్చారు. ఇదే అదనుగా భావించిన గణపతి.. ఓ బైక్ కొట్టేశాడు.

బైక్ మీద మెల్లగా అక్కడి నుంచి జారుకొని కొద్ది దూరం వెళ్లి బేరం పెట్టాడు. అప్పటికప్పుడు అమ్మేసి అందినంత సొమ్ము చేసుకోవాలనేది అతడి ప్లాన్. కానీ పెళ్లికి వచ్చిన వ్యక్తి తన బైక్‌ కనిపించకపోవడంతో.. అక్కడున్న వారందర్నీ అడిగి చూశాడు. పెళ్లిలో బైక్ పోయిన విషయం ఆ నోటా ఈ నోటా స్థానికులందరికీ తెలిసింది.

చివరకు బండిని విక్రయానికి పెట్టిన గణపతి స్థానికులకు చిక్కాడు. బండి సైతం అతడి దగ్గరే ఉంది. నువ్వెవరు..? ఎక్కడి నుంచి వచ్చావ్..? అని విచారిస్తుండగా.. గణపతి చేతికి బేడి కనిపించింది. స్థానికులు గట్టిగా నిలదీయడంతో తాను నేలకొండపల్లి పోలీసు స్టేషన్ నుంచి పారిపోయి వచ్చినట్లు ఒప్పుకున్నాడు. దీంతో కూసుమంచి పోలీసులు అతణ్ని అదుపులోకి తీసుకొని నేలకొండపల్లి పోలీసులకు అప్పగించారు.