పువ్వాడ అజయ్‌ని కమ్మ కులం నుంచి బహిష్కరించాలి: రేవంత్ డిమాండ్

మంత్రి పువ్వాడ అజయ్‌కుమార్‌ అక్రమాలపై సీబీఐ విచారణ జరిపించాలన టీపీసీసీ అధ్యక్షుడు రేవంత్ రెడ్డి డిమాండ్ చేశారు. ఖమ్మంలో మీడియాతో మాట్లాడిన ఆయన.. ఈడీ కేసులు, కాంగ్రెస్ కార్యకర్తల ఆత్మహత్యలు, మమతా కాలేజీలో సీట్ల అక్రమాలపై సీబీఐతో విచారణ జరపాలని కోరారు. పువ్వాడకు దమ్ముంటే ఆయనే స్వయంగా సీబీఐ విచారణ కోరాలన్నారు. పువ్వాడ అజయ్‌ని కమ్మం కులం నుంచి బహిష్కరించాలని కులపెద్దలను కోరారు.కాంగ్రెస్ పార్టీ ద్వారా రాజకీయ జీవితం పొందిన పువ్వాడ అజయ్‌... టీఆర్ఎస్‌లో చేరి కాంగ్రెస్ కార్యకర్తల ప్రాణాలు తీసేలా వ్యవహరిస్తున్నారని రేవంత్ రెడ్డి ఆరోపించారు. కేసీఆర్‌తో పాటు మంత్రులు, టీఆర్ఎస్ ఎమ్మెల్యేలు రోజులు లెక్కపెట్టుకోవాలని మరో 365 రోజుల్లో వారి అధికారం కూలడం ఖాయమని అన్నారు. వరంగల్‌లో జరిగే రాహుల్‌ గాంధీ సభకు ప్రతి నియోజకవర్గం నుంచి 15వేల మంది కార్యకర్తలు తరలివచ్చి కార్యక్రమాన్ని దిగ్విజయం చేయాలని పిలుపునిచ్చారు.

కార్యకర్తల అత్యుత్సాహం.. రేవంత్ రెడ్డి ఖమ్మం పర్యటన రసాభాసగా మారింది. అత్యుత్సాహానికి పోయిన పార్టీ కార్యకర్తలు స్టేజీ మీదికి గుంపులుగా వచ్చే ప్రయత్నం చేశారు. దీంతో తోపులాట జరిగి కొందరు కార్యకర్తలు గాయపడ్డారు. కార్యకర్తల అత్యుత్సాహంపై రేవంత్ రెడ్డి తీవ్ర ఆగ్రహం వ్యక్తం చేశారు.