Mahabubnagar: 3 గంటలపాటు వాన బీభత్సం.. వరదలో కొట్టుకుపోయిన వాహనాలు

మహబూబ్‌నగర్ జిల్లాను ఎడతెరిపిలేని వాన అతలాకుతలం చేసింది. సుమారు 3 గంటల పాటు భారీ వర్షం కురిసింది. మహబూబ్ నగర్ పట్టణంలోని పలు ప్రాంతాలు జలమయం అయ్యాయి. పలు కాలనీలలో ఇళ్లలోకి వర్షపు నీరు చేరడంతో ప్రజలు తీవ్ర ఇబ్బందులు ఎదుర్కొంటున్నారు. జిల్లా కేంద్రంలో లోతట్టు ప్రాంతాలైన రామయ్యబౌలి, భగీరథ కాలనీ, పాత పాలమూరు, కురిహిశెట్టి కాలనీలు వాగులను తలపిస్తున్నాయి. వరద ప్రవాహంలో కార్లు, బైకులు కొట్టుకుపోయాయి. వరద నీటిలో ఓ కారు కొట్టుకుపోతున్న దృశ్యాలు వైరల్ అవుతున్నాయి. ఇటు హైదరాబాద్‌లోనూ వరుసగా నాలుగో రోజు భారీ వర్షం కురిసింది.

గురువారం (సెప్టెంబర్ 29) ఉదయం 11:30 గంటలకు ముసురుతో మొదలైన వర్షం అంతకంతకూ పెరిగింది. మధ్యాహ్నం తర్వాత నుంచి ఎడతెరిపిలేకుండా వాన కురిసింది. ఉమ్మడి మహబూబ్ నగర్ జిల్లాలోని అచ్చంపేట, ఆమనగల్లు, మిడ్జిల్, వంగూరు, తలకొండపల్లి, నాగర్ కర్నూల్, తెల్కపల్లి ప్రాంతాల్లోనూ భారీ వర్షం కురుసింది. మహబూబ్ నగర్ అర్బన్ తహసీల్దార్ పరిధిలో అత్యధికంగా 64 మిల్లీ మీటర్ల వర్షపాతం నమోదైంది.

మహబూబ్ నగర్‌లో భారీ వర్షాల గురించి తెలుసుకున్న మంత్రి శ్రీనివాస్ గౌడ్ అధికారులకు కీలక ఆదేశాలు ఇచ్చారు. 36వ జాతీయ క్రీడల ప్రారంభోత్సవ కార్యక్రమం నిమిత్తం గుజరాత్‌లోని అహ్మదాబాద్‌కు వెళ్లిన రాష్ట్ర క్రీడల శాఖ మంత్రి.. అక్కడి మైదానం నుంచే అధికారులకు ఫోన్ చేసి దిశానిర్దేశం చేశారు. లోతట్టు ప్రాంతాల ప్రజలను సురక్షిత ప్రాంతాలకు తరలించాలని సూచించారు. అధికారులు క్షేత్ర స్థాయిలో ఉండి సహాయక కార్యక్రమాలను పర్యవేక్షించాలని ఆదేశించారు.

మరో రెండు రోజులూ భారీ వర్షాలు
తెలంగాణలో రేపు, ఎల్లుండి కూడా భారీ వర్షాలు కురిసే అవకాశం ఉందని హైదరాబాద్‌ వాతావరణ కేంద్రం తెలిపింది. కొన్ని ప్రాంతాల్లో అతి భారీ వర్షాలు కురుస్తాయని వెల్లడించింది. కొన్ని జిల్లాలకు ఆరెంజ్ అలర్ట్ జారీ చేసింది. నల్గొండ, సూర్యాపేట, యాదాద్రి భువనగిరి, వికారాబాద్‌, సంగారెడ్డి, మెదక్‌ జిల్లాల్లో అతి భారీ వర్షాలు కురిసే అవకాశం ఉందని తెలిపింది.

కొమురం భీం ఆసిఫాబాద్‌, మంచిర్యాల, కరీంనగర్‌, పెద్దపల్లి, భూపాలపల్లి, ములుగు, భద్రాద్రి కొత్తగూడెం, ఖమ్మం, వరంగల్‌, హన్మకొండ, జనగాం, సిద్దిపేట, రంగారెడ్డి, హైదరాబాద్‌, మేడ్చల్‌ మల్కాజిగిరి, కామారెడ్డి జిల్లాల్లో ఉరుములు, మెరుపులతో కూడిన భారీ వర్షాలు కురిసే అవకాశం ఉందని పేర్కొంది. మహబూబ్ నగర్‌, నాగర్‌ కర్నూల్‌, వనపర్తి, నారాయణపేట, జోగులాంబ గద్వాల జిల్లాల్లో భారీ వర్షాలు కురిసే అవకాశం ఉందని తెలిపింది. ఈ జిల్లాలకు ఎల్లో హెచ్చరికలు జారీ చేసింది.