Jupally Vs Beeram: నేనే తప్పు చేయలేదు.. హర్షవర్ధన్ రెడ్డిపై పరువు నష్టం దావా వేస్తా: జూపల్లి

నాగర్‌కర్నూల్ జిల్లాలో అధికార టీఆర్ఎస్‌లో వర్గ పోరు తారాస్థాయికి చేరింది. కొల్లాపూర్‌‌లో మాజీ మంత్రి జూపల్లి కృష్ణారావు, ఎమ్మెల్యే బీరం హర్షవర్ధన్‌రెడ్డి బహిరంగ చర్చకు సిద్ధమైన నేపథ్యంలో అక్కడ హైటెన్షన్ వాతావరణం నెలకొంది. ఈ క్రమంలోనే ఎమ్మెల్యే హర్షవర్ధన్ రెడ్డిని పోలీసులు అరెస్టు చేసి పీఎస్‌కు తరలించారు. ఈ సందర్భంగా మాజీ మంత్రి జూపల్లి మీడియాతో మాట్లాడారు. ఎమ్మెల్యే హర్షవర్ధన్‌రెడ్డిపై తీవ్ర స్థాయిలో మండిపడ్డారు.

తాను సంపాదించిన పేరు, ప్రతిష్టను మసకబార్చే ప్రయత్నం చేస్తున్నారని ఎమ్మెల్యే మండిపడ్డారు జూపల్లి.. మంచి చేసి పేరు సంపాదించాలని.. కానీ చౌకబారు రాజకీయాలెందుకు అని ప్రశ్నించారు. తనపై చేసిన ఆరోపణలపై చర్చకు సిద్ధమా? అని ఎమ్మెల్యేకు సవాల్ చేశానని గుర్తుచేశారు. ధైర్యముంటే అంబేద్కర్ చౌరస్తాకు రమ్మని 15 రోజుల సమయమిచ్చానని చెప్పుకొచ్చారు. అయితే హర్షవర్ధన్ రెడ్డి అంబేద్కర్ చౌరస్తాలో కాకుండా తన ఇంటికొస్తానని అన్నారని తెలిపారు.

ఎమ్మెల్యే హర్షవర్ధన్ రెడ్డి కోసం ఉదయం నుంచి ఎదురుచూస్తున్నానని.. కానీ ఇప్పటివరకు రాలేదని జూపల్లి చెప్పారు. తన వద్దకు వచ్చేందుకు ధైర్యం చాలక హర్షవర్ధన్ రెడ్డి పోలీసుల చేత అరెస్ట్ చేయించుకున్నారని ఆరోపించారు. అతని వర్గీయులకు మాత్రమే హర్షవర్ధన్ రెడ్డి మేలు చేశారని విమర్శించారు. తనది మచ్చలేని చరిత్ర కాబట్టే.. ఐదు సార్లు ఎమ్మెల్యేగా గెలిపించారని అన్నారు. తాను అప్పులు చేసి వ్యాపారం చేశానని.. తప్పులు చేయలేదని తెలిపారు. ‘ఫ్రుడెన్షియల్ బ్యాంకు నుంచి 2007లో రూ.7 కోట్ల లోన్ తీసుకున్నా.. ఆ తర్వాత రూ.14 కోట్ల వరకు కట్టి సెటిల్ చేసుకున్నా.. ఇంకే బ్యాంక్ రుణం తీసుకొని ఎగ్గొట్టలేదు. రాజకీయ లబ్ధి పొందేందుకు నాపై ఆరోపణలు చేస్తున్నారు. ఎమ్మెల్యే ఆరోపణలతో బాధపడ్డాను. నాపై అన్యాయంగా ఏసీబీ కేసు పెట్టారు. ఈ విషయాన్ని అసెంబ్లీలోనే చెప్పా.. ఎమ్మెల్యేపై ఆరోపణలపై పరువు నష్టం దావా వేస్తా..’ అని జూపల్లి ప్రకటించారు.