జూరాల‌కు వరద ఉధృతి.. 8 గేట్లు ఎత్తి నీటి విడుదల

Telangana Rains: తెలంగాణలో 2 రోజులుగా కురిసిన కుండపోత వానలతో రాష్ట్రంలోని జలాశయాలకు భారీగా వరద నీరు పోటెత్తింది. గద్వాల జిల్లాలోని జూరాల ప్రాజెక్ట్‌కు (Jurala Dam) మరోసారి వరద ఉధృతి పెరిగింది. అధికారులు ప్రాజెక్ట్ 8 గేట్లు ఎత్తివేసి నీటిని దిగువకు విడుదల చేశారు. అటు శ్రీశైలం ప్రాజెక్టు (Srisailam Dam) 5 గేట్లు ఎత్తి నీటిని దిగువకు విడుదల చేస్తున్నారు. పర్యాటకుల రాకతో ప్రాజెక్టుల వద్ద సందడి నెలకొంది.

Authored byశ్రీనివాస్ గంగం | Samayam Telugu 9 Aug 2022, 4:07 pm

తెలంగాణలో రెండు రోజులుగా కురిసిన కుండపోత వానలతో రాష్ట్రంలోని జలాశయాలకు భారీగా వరద నీరు పోటెత్తింది. గద్వాల జిల్లాలోని జూరాల ప్రాజెక్ట్‌కు (Jurala Dam) మరోసారి వరద ఉధృతి పెరిగింది. అధికారులు ప్రాజెక్ట్ ఎనిమిది గేట్లు ఎత్తివేసి నీటిని దిగువకు విడుదల చేశారు. ప్రాజెక్టు వద్ద ప్రస్తుతం ఇన్ ఫ్లో 58,000 క్యూసెక్కులు ఉండగా.. ఔట్ ఫ్లో 73,717 క్యూసెక్కులుగా ఉన్నట్లు తెలిపారు. జూరాల ప్రాజెక్టు పూర్తి స్థాయి నీటి మట్టం 318.720 అడుగులు కాగా.. ప్రస్తుత నీటి మట్టం 317.700కు చేరుకుంది. జలాశయం పూర్తి స్థాయి నీటి సామర్థ్యం 9.657 టీఎంసీలు కాగా.. ప్రస్తుత నీటి నిల్వ 8.068 టీఎంసీలుగా ఉంది. ఎగువ జూరాల జల విద్యుత్ కేంద్రంలో 6 యూనిట్లలో 234 మెగావాట్ల విద్యుత్ ఉత్పత్తి జరుగుతుండగా.. దిగువ జూరాల జల విద్యుత్ కేంద్రంలో 6 యూనిట్లలో 240 మెగావాట్ల విద్యుత్‌ను ఉత్పత్తి జరుగుతోందని అధికారులు తెలిపారు.

అటు ఎగువ నుంచి వరద ప్రవాహం పెరుగుతుండటంతో శ్రీశైలం ప్రాజెక్టు (Srisailam Project) 5 గేట్లు ఎత్తి నీటిని దిగువకు విడుదల చేస్తున్నారు. ప్రాజెక్టు వద్ద పర్యాటకులతో సందడి నెలకొంది. నల్గొండ, మహబూబ్ నగర్‌తో పాటు కర్ణాటకలో కురిసిన వానలతో కృష్ణా నదికి వరద ప్రవాహం పెరిగింది.

జూరాల‌కు వరద ఉధృతి.. 8 గేట్లు ఎత్తి నీటి విడుదల

తరవాత కథనం