Lovers: పెద్దోళ్ల పంతం.. మనస్తాపంతో ప్రేమజంట ఆత్మహత్య

ప్రేమ పెళ్లికి పెద్దలు ఒప్పుకోలేదన్న మనస్తాపంతో ప్రేమజంట ఆత్మహత్య చేసుకున్న ఘటన నాగర్ కర్నూల్ జిల్లాలో విషాదం నింపింది. ప్రేమించిన యువకుడిని పెళ్లి చేసుకుంటానంటే తల్లిదండ్రులు ఒప్పుకోలేదని యువతి.. ప్రియురాలు లేని లోకంలో జీవించలేనని యువకుడు బలవన్మరణానికి పాల్పడ్డారు. ఈ ఘటన రెండు కుటుంబాల్లో తీవ్ర విషాదం నింపింది.
Lovers: పెద్దోళ్ల పంతం.. మనస్తాపంతో ప్రేమజంట ఆత్మహత్య
నాగర్‌ కర్నూల్‌ జిల్లా తాడూరు మండలం తుమ్మలసూగురు గ్రామానికి చెందిన అల్లావుద్దీన్‌, హసీనాల కుమారుడు గౌస్‌(21), ఎండి.పాష, ఖాజమ్మ దంపతుల కుమార్తె గౌసియా(18) కొంతకాలంగా ప్రేమించుకుంటున్నారు. ఈ విషయం తెలుసుకున్న గౌసియా తల్లిదండ్రులు ఆమెను మందలించారు. దీంతో గౌస్‌ను తాను ప్రేమించానని, పెళ్లి చేసుకుంటానని యువతి చెప్పడంతో వారు ఆగ్రహానికి లోనయ్యారు. పది రోజుల క్రితం ఇదే విషయమై గౌస్‌ను తీవ్రంగా మందలించారు. తమ కూతురి వెంట పడితే తీవ్ర పరిణామాలుంటాయని హెచ్చరించారు.

దీంతో తన ప్రేమకు తల్లిదండ్రులు అడ్డుపడుతున్నారన్న మనస్తాపంతో గౌసియా శనివారం మధ్యాహ్నం ఇంట్లోనే ఉరేసుకుని ఆత్మహత్య చేసుకుంది. ప్రియురాలు ఆత్మహత్య చేసుకుందని తెలుసుకున్న గౌస్ గ్రామ సమీపంలోని కేఎల్‌ఐ కాల్వ వద్ద ఉరేసుకుని ఆత్మహత్య చేసుకున్నాడు. అంతకుముందు కుటుంబసభ్యులకు వీడియో కాల్ చేసి తాను చనిపోతున్నానని చెప్పాడు. ప్రేమజంట ఆత్మహత్యతో గ్రామంలో విషాదఛాయలు అలుముకున్నాయి. అయితే ఈ ఘటనలపై తమకు ఎలాంటి ఫిర్యాదు అందలేదని పోలీసులు చెబుతున్నారు.