NHAI: తెలుగు రాష్ట్రాల మధ్య 4 లైన్ నేషనల్ హైవే.. ఈ ప్రాంతాల గుండా నిర్మాణం

National Highway 167K: ఏపీ, తెలంగాణ వాసులకు కేంద్రం మరో గుడ్ న్యూస్ చెప్పింది. రెండు రాష్ట్రాలను అనుసంధానిస్తూ.. మరో జాతీయ రహదారి నిర్మాణానికి కేంద్ర ప్రభుత్వం పచ్చ జెండా ఊపింది. రూ. 4,706 కోట్ల అంచనా వ్యయంతో ఈ రహదారిని నిర్మించేందుకు సిద్ధమయ్యారు. తెలంగాణలోని నాగర్ కర్నూల్ జిల్లా కల్వకుర్తి నుంచి ఏపీలోని వైఎస్సాఆర్ జిల్లా జమ్మలమడుగు వరకు 255 కి.మీ మేర ఈ రహదారిని నిర్మించ తలపెట్టారు. నాలుగు వరుసలుగా నిర్మించనున్న ఈ రహదారికి కేంద్ర రవాణా, జాతీయ రహదారుల శాఖ నుంచి ఆమోదం లభించింది. రెండు తెలుగు రాష్ట్రాలను కలుపుతూ నిర్మించే ఈ రహదారి (NH 167K)ని ఏడు ప్యాకేజీల కింద నిర్మించనున్నారు. మెుత్తం 255 కిలో మీటర్లలో తెలంగాణలో 91 కి.మీ. నిర్మించనున్నారు. అందు కోసం రూ.2,406 కోట్ల వ్యయంతో డీపీఆర్ సిద్ధం చేశారు. మొదటి ప్యాకేజీ కింద రూ.886.69 కోట్లు, రెండో ప్యాకేజీ కింద రూ.1,082.40 కోట్లు, మూడో ప్యాకేజీ కింద రూ.436.91 కోట్లతో రహదారి నిర్మాణ పనులు చేపట్టేందుకు NHAI టెండర్ల ప్రక్రియను చేపట్టింది.

ఆంధ్రప్రదేశ్‌లో రూ.2,300 కోట్ల అంచనా వ్యయంతో 164 కి.మీ. మేర రహదారిని నిర్మించనున్నారు. ఏపీలో మొత్తం నాలుగు ప్యాకేజీల రహదారిని నిర్మించేందుకు ప్రణాళికలు సిద్ధం చేశారు. నంద్యాల జిల్లా సిద్ధేశ్వరం నుంచి వైఎస్సార్‌ జిల్లా జమ్మలమడుగు వరకు ఈ రహదారిని నిర్మిస్తారు. మొదటి ప్యాకేజి కింద 62.57 కి.మీ. మేర రహదారి నిర్మాణానికి రూ.785 కోట్లతో రహదారి పనులకు డీపీఆర్‌ను సిద్ధం చేశారు. రూ.1,515 కోట్ల అంచనా వ్యయంతో మిగిలిన మూడు ప్యాకేజీల కింద పనులను పూర్తి చేసేందుకు NHAI డీపీఆర్‌ను రూపొందిస్తోంది. మెుత్తం నాలుగు ప్యాకేజీల డీపీఆర్‌లు ఖరారయ్యాక 2023 ఫిబ్రవరి మొదటి వారంలో టెండర్ల ప్రక్రియ చేపట్టి ఏడాదిన్నర లో నిర్మాణాన్ని పూర్తి చేయాలని ఎన్‌హెచ్‌ఏఐ ప్రణాళికలు రూపొందిస్తోంది.

రహదారిలో అంతర్భాగంగా ఇప్పటికే కృష్ణా నదిపై వంతెన నిర్మాణానికి ఎన్‌హెచ్‌ఏఐ టెండర్ల ప్రక్రియ చేపట్టింది. కాగా, ఏపీ - తెలంగాణ రాష్ట్రాలను అనుసంధానిస్తూ నాలుగు వరుసల రహదారి నిర్మాణ ప్రక్రియకు తాజాగా ఆమోదం తెలిపింది. ఈ రహదారి నిర్మాణం పూర్తయితే రెండు తెలుగు రాష్ట్రాల మధ్య ప్రయాణం మరింత సులభం కానుంది. దాంతో పాటు రహదారి వెంట అభివృద్ధి జరిగి పెట్టుబడులకు, నూతన పరిశ్రమల రాకకు అవకాశం ఏర్పడనుంది.

Read More Telangana News And Telugu News