కు.ని. ఆపరేషన్ ఫెయిల్.. సర్పంచ్ మృతి, ఒకేరోజు 145 ఆపరేషన్లు

నారాయణపేట జిల్లాలో విషాదం చోటు చేసుకుంది. నారాయణపేట జిల్లాలోని దామరగిద్ద మండలం లింగాపల్లి గ్రామానికి చెందిన సర్పంచ్ మంగళవారం మరణించారు. అయితే, ఈమె వైద్యం వికటించి చనిపోవడం గమనించదగ్గ విషయం. అది కూడా ఆమె కుటుంబ నియంత్రణ ఆపరేషన్ ఫెయిలై చనిపోయారు. దామరగిద్దలోని ప్రాథమిక ఆరోగ్య కేంద్రంలో ఈ కుటుంబ నియంత్రణ ఆపరేషన్ చేశారు. పూర్తి వివరాలివీ..

లింగాపల్లి సర్పంచ్ అయిన లక్ష్మి కుటుంబ నియంత్రణ ఆపరేషన్ కోసం ఓ ఆసుపత్రిలో చేరింది. ఆసుపత్రిలో ఆమెకు డాక్టర్లు కుటుంబ నియంత్రణ ఆపరేషన్ నిర్వహించారు. ఈ ఆపరేషన్ వికటించడంతో ఆమె చనిపోయింది. తొలుత ఆపరేషన్ ముగిశాక లక్ష్మి ఆరోగ్యం బాగా విషమించింది. దీంతో ఆమెను జిల్లా ఆస్పత్రికి తరలించారు. అక్కడ చికిత్స పొందుతుండగానే లక్ష్మి మరణించింది. ఇలా సర్పంచ్ లక్ష్మి మరణించడంతో ఆ గ్రామంలో విషాద ఛాయలు నెలకొన్నాయి. అయితే, డాక్టర్ల నిర్లక్ష్యంతోనే తన భార్య చనిపోయిందని సర్పంచ్ భర్త ఆరోపిస్తున్నారు.

ఇవాళ ఒక్కరోజే స్థానికంగా 145 మందికి కుటుంబ నియంత్రణ ఆపరేషన్లు నిర్వహించారు. అయితే, ఇలా ఆపరేషన్లు చేసి బెడ్లు లేక మహిళలను నేలపై పడుకోబెట్టారు. ఈ తీరుపై స్థానికుల నుంచి విమర్శలు వస్తున్నాయి. గతంలోనూ కుటుంబ నియంత్రణ ఆపరేషన్లు ఫెయిలై మరణించిన వారు ఉన్నారు.