పెళ్లింట పెను విషాదం.. ఉదయం దగ్గరుండి పెళ్లి.. సాయంత్రంలోపే అలా..

పెళ్లింట విషాదం నెలకొంది.. ఉదయం చెల్లి పెళ్లి చేసిన అన్న.. దురదష్టవశాత్తు సాయంత్రం ఓ రోడ్డు ప్రమాదంలో మృతి చెందాడు.. గద్వాల జిల్లా అయిజ మండలం చిన్నతాండ్రపాడు గ్రామంలో ఆదివారం ఈ ఘటన చోటు చేసుకుంది.

వివరాల్లోకి వెళ్తే.. మండల పరిధిలోని చిన్నతాండ్రపాడు గ్రామానికి చెందిన అంకె సత్యన్న, మహేశ్వరమ్మ దంపతులకు ఇద్దరు కుమారులు, ఒక కుమార్తె ఉన్నారు. కూతురి పెళ్లి ఆదివారం ఉదయం గట్టు మండలం ముచ్చోనిపల్లిలో ఘనంగా చేశారు. ముచ్చోనిపల్లి నుంచి బస్సులు లేకపోవడంతో పెళ్లి అయిపోయాక బంధువులను తిరిగి చిన్నతాండ్రపాడుకు సత్యన్న, మహేశ్వరమ్మ పెద్ద కుమారుడు సాయికుమార్‌ (24) బైక్‌పై తీసుకొచ్చాడు.

ఈ క్రమంలోనే తిరిగి ముచ్చోనిపల్లికి వెళ్తుండగా, అయిజ సమీపంలోకి రాగానే బైక్‌ అదుపు తప్పి ప్రమాదం జరిగింది. దీంతో రోడ్డుకు బలంగా తగలడంతో తలకు బలమైన గాయమైంది. దీంతో కర్నూల్‌ ఆస్పత్రికి తరలిస్తుండగా, బొంకూర్‌ సమీపంలో మృతి చెందాడు. కేసు నమోదు చేసి దర్యాప్తు చేస్తున్నామని పోలీసులు తెలిపారు.