ముందుచూపుతో నిర్ణయాలు తీసుకోండి..
ప్లాంట్‌లో కనీసం 30 రోజులకు అవసరమైన బొగ్గు నిల్వలు ఉండేలా చర్యలు చేపట్టాలని అధికారులను కేసీఆర్ ఆదేశించారు. కీలకమైన విద్యుత్ ప్రాజెక్ట్‌ విషయంలో బొగ్గు నిల్వలు సహా ఇతర నిర్వహణలో అధికారులు ముందుచూపుతో వ్యవహరించి నిర్ణయాలు తీసుకోవాలని సూచించారు. యాదాద్రి ప్లాంట్ నుంచి హైదరాబాద్ సహా అన్ని ప్రాంతాలకు విద్యుత్ కనెక్టివిటీ ఉండేలా ఏర్పాట్లు చేసుకోవాలన్నారు. నీటి సరఫరాకు కృష్ణా నీటిని సరఫరా చేసేలా ఏర్పాట్లు చేయాలన్నారు.
100 ఎకరాలు సేకరించండి..
విద్యుత్ కేంద్రంలో పనిచేసే సుమారు 10 వేల మంది సిబ్బందికి ఉపయోగపడేలా అద్భుతమైన టౌన్‌షిప్ నిర్మాణం చేయాలని అధికారులను కేసీఆర్ ఆదేశించారు. అక్కడే భవిష్యత్‌లో సౌర విద్యుత్ ప్లాంట్ చేపట్టనున్న నేపథ్యంలో సిబ్బంది ఇంకా పెరిగే అవకాశం ఉందని.. అందుకు అనుగుణంగా జాగ్రత్తలు తీసుకోవాలన్నారు. సిబ్బంది క్వార్టర్స్ ఇతర సదుపాయాల కోసం ప్రత్యేకంగా 100 ఎకరాలు సేకరించాలని అధికారులకు సూచించారు. స్పోర్ట్స్ కాంప్లెక్స్‌కి 50 ఎకరాలు కేటాయించాలన్నారు. ఇతర అవసరాలకు మరో 50 ఎకరాలు వినియోగించాలన్నారు.
నాలుగు వరుసల రోడ్డు మంజూరు..
పవర్‌ప్లాంట్ సిబ్బందికి సేవలందించే ప్రైవేట్ సర్వీస్ ఉద్యోగులకు అవసరమైన క్వార్టర్స్ నిర్మాణం కూడా చేపట్టాలని కేసీఆర్ తెలిపారు. దామరచర్ల హైవే నుంచి వీర్లపాలెం పవర్ ప్లాంట్ వరకు 7 కిలోమీటర్ల మేర నాలుగు వరుసల రోడ్డు మంజూరు చేయాలని కార్యదర్శి స్మితా సబర్వాల్‌ను సీఎం ఆదేశించారు. రైల్వే క్రాసింగ్ వద్ద ఆర్వోబీ నిర్మాణంతో పాటు దామరచర్ల రైల్వే స్టేషన్ విస్తరణకు రైల్వే శాఖతో సమన్వయం చేసుకోవాలని అధికారులకు కేసీఆర్ సూచించారు.
ప్రభాకర్ రావుకు అభినందనలు..
యాదాద్రి పవర్ ప్లాంట్ నిర్మాణంలో 2 యూనిట్స్ 2023 డిసెంబర్ వరకు పూర్తవుతాయని.. మిగతావి జూన్ 2024 లోపు పూర్తవుతాయని ట్రాన్స్ కో, జెన్ కో సీఎండీ ప్రభాకర్‌రావు.. సీఎం కేసీఆర్‌కి తెలిపారు. కరోనా వల్ల ఏడాదిన్నరకు పైగా ప్లాంట్ నిర్మాణంలో ఆలస్యం జరిగిందని ప్రభాకర్ రావు సీఎంకి వివరించారు. పవర్ ప్లాంట్ నిర్మాణం జరుగుతున్న తీరుపై ట్రాన్స్‌కో, జెన్‌కో సీఎండీ ప్రభాకర్ రావును కేసీఆర్ అభినందించారు.
అక్కడిక్కడే తగుచర్యలు..
విద్యుత్ కేంద్రం కోసం భూమి ఇచ్చిన రైతులతో పాటు, గతంలో సాగర్‌ ప్రాజెక్టుకు సహకరించిన రైతుల పెండింగ్ సమస్యలను పరిష్కరించాలని సీఎస్ సోమేశ్‌కుమార్‌తో పాటు కలెక్టర్‌ని సీఎం కేసీఆర్ ఆదేశించారు. స్థానిక ప్రజలు ఇచ్చిన వినతి పత్రాలు తీసుకునేందుకు ఎక్కువ సమయం కేటాయించిన కేసీఆర్.. అక్కడిక్కడే తగుచర్యలు తీసుకోవాలని అధికారులకు పలు సూచనలు చేశారు.
యాదాద్రి థర్మల్ పవర్ ప్లాంట్
Read More:
- Read More Telangana News and Telugu News