నల్గొండ డీఈవో ఆఫీస్ వద్ద ఉద్రిక్తత.. లోకల్ అడ్డా కూలీలు, బిహార్ కూలీల మధ్య ఫైట్

నల్గొండ డీఈవో ఆఫీస్ చౌరస్తాలో ఈ ఉదయం ఉద్రిక్తత చోటుచేసుకుంది. కూలీల అడ్డా వద్ద లోకల్ కూలీలు, బీహార్ కూలీల మధ్య ఘర్షణ తలెత్తింది. దీంతో పరస్పరం రాళ్లతో దాడి చేసుకున్నారు. కూలీ డబ్బుల విషయంలో చెలరేగిన వివాదం చినికి చినికి గాలి వానలా మారింది.

కూలీలు రెండు గ్రూపులుగా విడిపోయి పరస్పరం రాళ్లతో దాడి చేసుకోవటంతో రహదారిపై వెళ్తున్న పలు వాహనాల అద్దాలు ధ్వంసమయ్యాయి. పరిసర ప్రాంతాలు రణరంగాన్ని తలపించాయి. విషయం తెలుసుకున్న పోలీసులు ఘటనాస్థలానికి చేరుకొని వారిని చెదరగొట్టారు.

నల్గొండ మండలంలోని వివిధ గ్రామాలకు చెందిన కూలీలతో పాటు ఇతర రాష్ట్రాలకు చెందిన కూలీలు భాస్కర్ థియేటర్ చౌరస్తా వద్దనున్న కూలీ అడ్డాకు చేరుకొని జిల్లా కేంద్రంలోని వివిధ పనులకు వెళుతుంటారు. వీరికి రోజవారీ కూలీగా రూ.600-700 వస్తుంది. అయితే బిహార్కు చెందిన కూలీలు మాత్రం 300-400 రూపాయలకే పనులకు వెళ్తుంటారు. దీంతో బిహార్ కూలీలకు డిమాండ్ పెరిగి.. స్థానిక కూలీలను ఎవరూ పనుల్లోకి తీసుకోవటంలేదు.

300 రూపాయలకు వెళితే కూలీ ఏం గిట్టుబాటు అవుతుందని స్థానిక కూలీలతో వాగ్వాదానికి దిగారు. మాట మాట పెరిగి కూలీలు రెండు గుంపులుగా చీలిపోయి ఒకరిపై ఒకరు రాళ్లు రువ్వుకున్నారు. దీంతో అక్కడ ఉద్రిక్త పరిస్థితులు నెలకొన్నాయి. ఘటన స్థలానికి చేరుకున్న పోలీసులు ఇరువర్గాలను చెదరగొట్టారు. ఘటనకు కారుకులైన కొందరిని అదుపులోకి తీసుకున్న పోలీసులు వన్ టౌన్ పోలీసు స్టేషన్కి తరలించి విచారిస్తున్నట్లు తెలిసింది.