Jagadish Reddy: 'ప్రపంచ చరిత్రలోనే ఆధారాలు లేకుండా అభియోగాలు మోపడం అంటే ఇదేనేమో'

Jagadish Reddy: నకిరేకల్ నియోజకవర్గ పరిధిలోని రామన్నపేట మండల కేంద్రంలో జరిగిన బీఆర్ఎస్ ఆత్మీయ సమ్మేళనంలో మంత్రి జగదీష్ రెడ్డి పాల్గొన్నారు. ఈ సందర్భంగా ఢిల్లీలో జరుగుతున్న కవిత ఈడీ విచారణపై ఆయన స్పందించారు. హస్తినలో అసలు లిక్కర్ స్కామ్ ఎక్కడిదని ప్రశ్నించిన ఆయన.. పాలసీనే స్కామ్‌గా అభివర్ణిస్తున్నారని ఆరోపించారు. సీబీఐ, ఈడీలకు అందులో ఏమి లేదని తెలుసని, ఈడీపై ఒత్తిడి తెచ్చి బీజేపీ రాజకీయం చేస్తుందని ఆరోపించారు. ప్రపంచ చరిత్రలోనే ఆధారాలు లేకుండా అభియోగాలు మోపడం అంటే ఇదేనేమో? అని పేర్కొన్నారు.బీజేపీ నేతల ఫిర్యాదుతోనే ఈడీ ఎపిసోడ్ మొదలైందని, బీజేపీ నేతల ప్రకటనలే ఇందుకు నిదర్శనమని తెలిపారు. కవితకు స్కాంలో ఎటువంటి సంబంధం లేదని, సీఎం కేసీఆర్ ఆత్మస్థైర్యం దెబ్బతీసే శక్తి ఎవరికీ రాలేదన్నారు. ఈ ఆత్మీయ సమ్మేళనంలో పలువురు ఎమ్మెల్యేలు, బీఆర్ఎస్ కార్యకర్తలు పాల్గొన్నారు.

అయితే కవిత ఈడీ విచారణపై బీఆర్ఎస్ నేతలు మండిపడుతున్నారు. కావాలనే ఈడీ విచారణకు పిలిచి మానసికంగా ఇబ్బందులకు గురి చేస్తుందని విమర్శిస్తున్నారు. ఒక ఆడబిడ్డను ఉద్దేశపూర్వకంగా రోజూ విచారణకు పిలిచి మానసికంగా హింసిస్తున్నారని ఆరోపిస్తున్నారు. కాగా కవిత ఇప్పటివరకు మూడుసార్లు ఈడీ విచారణకు హాజరవ్వగా.. మరోసారి పిలిచే అవకాశాలున్నాయని తెలుస్తోంది.