57 మంది వైద్యులకు ప్రిన్సిపాల్ మెమోలు.. ఆ నిధుల దుర్వినియోగంపై ప్రశ్నించినందుకేనా..!

57 మంది వైద్యులకు ఓ మెడికల్‌ కాలేజీ ప్రిన్సిపాల్‌ మెమోలు జారీ చేయడం చర్చనీయాంశంగా మారింది. ఈ క్రమంలోనే ప్రిన్సిపాల్‌ తమను ఉద్దేశపూర్వకంగా వేధిస్తున్నారంటూ ఆ వైద్యులు ఆందోళనకు దిగి విధులు బహిష్కరించారు. నల్గొండ జిల్లా ఆస్పత్రికి అనుబంధంగా ఉన్న మెడికల్‌ కాలేజీలో బుధవారం ఈ ఘటన జరిగింది. వివరాల్లోకి వెళ్తే.. నల్గొండ మెడికల్‌ కాలేజీ పరిధిలో ఇటీవల బయోమెట్రిక్‌ పరికరాలు ఏర్పాటు చేశారు. ఈ క్రమంలోనే గత నెల 21వ తేదీ నుంచి ఈ నెల 20వ తేదీ వరకూ హాజరును పరిశీలించిన ప్రిన్సిపాల్‌.. కొందరు వైద్యులు 23 రోజుల పాటే విధులకు హాజరు కావడాన్ని గమనించారు. ఈ మేరకు వివరణ ఇవ్వాలంటూ 57 మంది వైద్యులకు మెమోలు పంపారు. దీంతో వారంతా ఆస్పత్రి సూపరింటెండెంట్‌ చాంబర్‌ ఎదుట నిరసన వ్యక్తం చేశారు. తమ వీక్లీ ఆఫ్‌లు, ప్రభుత్వ సెలవులను పరిగణనలోకి తీసుకోకపోవడమేంటని ప్రశ్నించారు. గత నెలలోనూ కొందరు వైద్యులకు 23 రోజులకే వేతనం ఇచ్చారని ఆవేదన వ్యక్తం చేశారు.

హైదరాబాద్‌కు ప్రధాని మోదీ.. నగరంలో ట్రాఫిక్ ఆంక్షలు.. పూర్తి వివరాలివే!
మూడేళ్లుగా ప్రిన్సిపాల్‌ తమపై కక్ష సాధింపు చర్యలకు పాల్పడుతున్నారని సదరు వైద్యులు ఆరోపించారు. క్లినికల్‌ డిపార్ట్‌మెంట్‌కు కేటాయించిన బడ్జెట్‌ను ప్రిన్సిపాల్‌ దుర్వినియోగం చేశారని చెబుతున్నారు. దీనిపై ప్రశ్నించినందుకే తమకు మెమోలు జారీ చేశారని అంటున్నారు. మెమోలను ఉపసంహరించుకునే వరకూ ఆందోళన కొనసాగిస్తామని హెచ్చరించారు. దీంతో వైద్య సేవలకు అంతరాయ కలగడంతో రోగులు ఇబ్బంది పడ్డారు. అయితే ఈ విషయమై మెడికల్‌ కళాశాల ప్రిన్సిపాల్‌ రాజకుమారి ఇప్పటివరకు స్పందించలేదు.