నేరేడ్‌మెట్‌లో విషాదం.. బాలుడి ప్రాణం తీసిన గాలిపటం

గాలిపటం ఓ నిండు ప్రాణాన్ని బలితీసుకుంది. కరెంట్ వైర్లకు గాలిపటం తగలడంతో దాన్ని తీయబోయి 12 ఏళ్ల బాలుడు ప్రమాద వశాత్తు ప్రాణాలు కోల్పోయాడు. ఈ విషాదకమరైన ఘటన హైదరాబాద్ నేరేడ్‌మెట్‌ ఠాణా పరిధిలో చోటు చేసుకుంది. పోలీసులు, బాధితులు తెలిపిన వివరాల ప్రకారం సాయినగర్‌లో కుమార్‌ (35) అనే వ్యక్తి కుటుంబం నివాసం ఉంటుంది. కూలీ పనులు చేసుకొని జీవిస్తున్న కుమార్‌కు ఇద్దరు పిల్లలున్నారు.

కీర్తన్ అనే 12 ఏళ్ల కుమారుడితోపాటు ఓ కూతురు కూడా ఉంది. శనివారం మధ్యాహ్నం మూడు గంట ల సమయంలో కీర్తన్‌ ఎదురింటి భవనంపైకి వెళ్లి గాలిపటాన్ని ఎగురవేస్తున్నాడు. ఆ సమయంలో భవనంపై వేలాడుతున్నా విద్యుత్‌ తీగల మధ్యలో గాలిపటం చిక్కుకుపోయింది. దీంతో గాలిపటాన్ని కరెంట్ తీగల నుంచి తప్పించబోయాడు. గాలిపటాన్ని అందుకుని లాగే ప్రయత్నంలో విద్యుత్‌ తీగలు ప్రమాదవశాత్తు బాలుడికి తగలడంతో తీవ్రంగా గాయపడి అక్కడిక్కడే కుప్పకూలిపోయాడు. దీంతో వెంటనే గమనించిన స్థానికులు, తల్లిదండ్రులు బాలుడిని రక్షించేందుకు దగ్గరలోని ఆస్పత్రికి తీసుకెళ్లారు.

Read More: తండ్రి సమాధి వద్ద రెండ్రోజులుగా ఏడుస్తున్న బాలిక.. జగిత్యాలలో కన్నీరు పెట్టించే ఘటన

కీర్తన్‌ను పరీక్షించిన డాక్టర్లు అప్పటికే మృతి చెందినట్టు నిర్ధారించారు. కన్నబిడ్డ కళ్లెదుటే ఇలా చనిపోవడంతో ఆ తల్లిదండ్రులు కన్నీరుమున్నీరుగా విలపిస్తుననారు. వారి ఆవేదనను చూసి చుట్టుపక్కల వాళ్లు సైతం కంటతడి పెట్టుకున్నారు. అయితే గత కొన్నేళ్లుగా ఇళ్లపై విద్యుత్ తీగలు వేలాడుతున్నా అధికారులు మాత్రం పట్టించుకోవడం లేదని ఆరోపిస్తున్నారు ఇళ్ల గోడలకు దగ్గరగా చేతులకు అందెంత దూరంలో ఉన్న కరెంట్ తీగలను తొలగించాలని గతంలో అనేకసార్లు స్థానికులు ఫిర్యాదు చేసిన ఫలితం లేకుండా పోయింది. ఇప్పటికైనా విద్యుత్ శాఖ అధికారులు ఇళ్లకు దగ్గర్లో ఉన్న కరెంట్ తీగలను తొలగించాలని కోరుతున్నారు.