కన్నవారికి కడుపుకోత.. కళ్లేదుట కన్నబిడ్డ మృత్యువాత

కళ్లముందు ఆడుతు పాడుతూ పెరగాల్సిన కన్నబిడ్డలు... తల్లిదండ్రుల కళ్లెదుటే చనిపోతే.. అంతకన్నా దౌర్భాగ్యం మరోకటి ఉండదు. అలాంటి విషాదకరమైన ఘటన తెలంగాణలోని మహబూబాబాద్ జిల్లాలో చోటు చేసుకుంది. కుటుంబంతో సరదాగా జలపాతం వద్దకు వెళ్లిన ఆ తల్లిదండ్రులకు కడుపుకోతే మిగిలింది. కళ్లెదుటే కుమార్తె కన్నుమూసి కానరాని లోకాలకు వెళ్లిపోయింది. కన్నవారికి తీవ్ర ఆవేదన మిగిల్చిన ఈ ఘటన జిల్లాలోని బయ్యారం మండలంలో ఆదివారం చోటుచేసుకుంది.

పోలీసులు, కుటుంబసభ్యుల తెలిపిన వివరాల ప్రకారం.. బయ్యారానికి చెందిన అంబటి సతీష్‌ కుటుంబంతో కలిసి మండలంలోని చింతోని గుంపు జలపాతానికి వెళ్లారు. ఆయన కుమార్తె 18 ఏళ్ల పూజిత నీటిలోకి దిగింది. దీంతో అతని కుమారుడు శివాజీ ఫొటో తీసేందుకు ప్రయత్నిస్తున్నాడు. ఈ క్రమంలో పూజిత ఒక్కసారిగా నీటిలో పడిపోయింది. వెంటనే సోదరుడు శివాజీ ఆమెను చేయి పట్టుకొని పైకిలాగేందుకు ప్రయత్నించాడు. ఈ క్రమంలో శివాజీ కూడా నీటిలోకి జారిపోయాడు. దీంతో తండ్రి సతీష్‌.. వెంటనే శివాజీని బయటకు లాగారు.
Read More: తెలంగాణలో మూడు రోజుల పాటు భారీ వర్షాలు
పూజిత కోసం ప్రయత్నించేలోపే ఆమె జలపాతంలో గల్లంతైంది. ఘటనపై సమాచారం అందుకున్న పోలీసులు స్థానిక యువకుల సాయంతో గాలింపు చర్యలు చేపట్టారు. దీంతో నీటిలో గల్లంతైన పూజిత మృతదేహం లభ్యమైంది. కళ్లముందే కన్నబిడ్డ క్షణాల్లోనే తమ విగతజీవిగా మారడంతో తల్లిదండ్రులు గుండెలవిసేలా రోదించారు. ఇంటర్‌ చదివిన పూజిత వెటర్నరీ కోర్సు పూర్తిచేసి ఉద్యోగ ప్రయత్నంలో ఉంది.