పెళ్లితో 50మందికి కరోనా... పాలకేంద్రం మూసివేత

కరోనా కలకలం కొనసాగుతూనే ఉంది. తెలుగు రాష్ట్రాల్లో రోజురోజుకు నమోదవుతున్న కేసులు ఆందోళనకు గురి చేస్తున్నాయి. కరోనా కారణంగా శుభకార్యాలు, పెళ్లిళ్లు కళ తప్పాయి. అతితక్కువమంది అతిథుల సమక్షంలో వేడుకలు నిర్వహిస్తున్న కరోనా మాత్రం వారిని వదలడం లేదు. కోవిడ్ నిబంధనలు పాటిస్తూ వివాహాలు జరిపిస్తున్నా.. కరోనా మాత్రం ఎవర్నీ వదలడం లేదు. తాజాగా నిజామాబాద్‌ జిల్లా బోధన్‌ పట్టణ పరిధిలోని చెక్కీ క్యాంపులో కరోనా కేసులు కలకలంకు గురి చేస్తున్నాయి.

పది రోజుల కిందట జరిగిన ఓ వివాహ వేడుక కారణంగా 50 మంది కరోనా వైరస్ బారిన పడ్డారు. కేవలం 193 గృహాలున్న క్యాంపులో 42 ఇళ్లలోని వారికి వైరస్‌ సోకింది. అయితే వారి ఆదాయ మార్గమైన గేదెల ఆలనా పాలనా ఇప్పుడు ఆందోళనకరంగా మారింది. మరోపక్క కొవిడ్‌ భయంతో ఇక్కడ పాలు కొనడానికి ఎవరూ రావడం లేదు. దీంతో పాల కేంద్రం 20 రోజులు మూసి ఉంచాలని నిర్ణయించారు.
Read More: గాంధీ ఆస్పత్రి నుంచి కరోనా సోకిన నలుగురు ఖైదీలు పరారీ
మరోవైపు తెలంగాణలో కరోనా పాజిటివ్ కేసులు రోజు రోజుకు పెరిగిపోతున్నాయి. ఈరోజు కొత్తగా 2,797 కరోనా పాజిటివ్ కేసులు నమోదు అయ్యాయి. గడిచిన 24 గంటల్లో కరోనాతో 8 మంది మృతి చెందారు. దీంతో రాష్ట్రంలో మొత్తం 1,14,483 కరోనా కేసులు నమోదు అవగా...మొత్తం 789 మరణాలు సంభవించాయి. ప్రస్తుతం తెలంగాణలో 27,600 యాక్టివ్ కేసులు ఉన్నాయి. 86,089 మంది కరోనా నుంచి కోలుకుని డిశ్చార్జ్ అయ్యారు. కొత్తగా జీహెచ్‌ఎంసీ 449 కేసులు నమోదు అయ్యాయి. నిజామాబాద్ జిల్లాలో 112 కేసులు రికార్డ్ అయ్యాయని వైద్య ఆరోగ్య శాఖ తెలిపింది.