పతంగి ఎగరేస్తూ జారిపడి బాలుడి మృతి

సంక్రాంతి పతంగులు పలు కుటుంబాల్లో విషాదం నింపుతున్నాయి. పతంగి ఎగరేసేందుకు ఇంటి రెండో అంతస్తు పైకెక్కిన బాలుడు ప్రమాదవశాత్తూ అక్కడ నుంచి కింద పడి దుర్మరణం పాలయ్యాడు. తండ్రి ఎదుటే ఈ విషాదం చోటు చేసుకుంది. మహబూబ్‌నగర్‌ జిల్లా జడ్చర్లలో మంగళవారం (జనవరి 14) సాయంత్రం జరిగిన ఈ ఘటనతో పండగ వేళ ఆ కుటుంబంలో తీవ్ర విషాదం అలుముకుంది.

గణేశ్ అనే వ్యక్తి జడ్చర్ల మండలం కేంద్రంలోని గౌరీశంకర్‌ కాలనీలో ఇల్లు అద్దెకు తీసుకొని నివాసం ఉంటున్నారు. పోలేపల్లి గ్రీన్‌పార్కులోని ఓ ప్రైవేట్‌ ఫార్మా పరిశ్రమలో పనిచేస్తన్న గణేశ్.. కుటుంబంతో కలిసి జడ్చర్లలో నివాసం ఉంటున్నారు. ఆయనకు కార్తీక్‌ అనే ఆరేళ్ల కుమారుడితో పాటు మూడేళ్ల పాప ఉంది.

సంక్రాంతి సెలవుల నేపథ్యంలో మంగళవారం సాయంత్రం తండ్రీకొడుకులిద్దరూ తాము నివాసం ఉంటున్న భవనం పైకెక్కి గాలిపటం ఎగరవేయడానికి సిద్ధమయ్యారు. గణేశ్ ఎగరవేసిన గాలిపటం ఎదురుగా ఉన్న ఇంటిపై ఇరుక్కొంది. అతడు దాన్ని తీసేందుకు వెళ్లగా.. దారం పట్టుకొని లాగుతూ వెనక్కి వెళ్లిన కార్తీక్‌ కిందకు జారి పడ్డాడు. ప్రహరీ లేకపోవడంతో ఈ ప్రమాదం జరిగింది.

ఆందోళనకు గురైన తల్లిదండ్రులు కార్తీక్‌ను హుటాహుటిని ఆస్పత్రికి తరలించారు. అప్పటికే ఆ బాలుడు మృతి చెందినట్లు వైద్యులు ధ్రువీకరించారు. తమ కుమారుడు ఇక లేడనే విషయం తెలిసి ఆ తల్లిదండ్రులు కన్నీరుమున్నీరవుతున్నారు.

Also Read: సాఫ్ట్‌వేర్ ఇంజనీర్ రోహిత ఆచూకీ లభ్యం.. కానీ, మరో ట్విస్ట్!

పతంగులు ఎగురవేసే సమయంలో తప్పనిసరిగా జాగ్రత్తలు తీసుకోవాలి. ప్రహరీ లేని భవంతుల పైన గాలిపటాలను ఎగురవేయకూడదు. విద్యుత్ తీగలు ఉన్న చోట కూడా పతంగులు ఎగురవేయరాదు. ఒకవేళ పతంగులు విద్యుత్ తీగలకు ఇరుక్కున్నా తీసే సాహసం చేయకూడదు. బహిరంగ ప్రదేశాల్లో పతంగులను ఎగరవేయడం సురక్షితం. పతంగులు ఎగురవేసే పిల్లలను నిర్లక్ష్యంగా వదిలేయకుండా.. తల్లిదండ్రులు ఓ కంట కనిపెట్టాలి. లేదంటే ఇలాంటి విషాదాలే జరుగుతాయి.