తెలంగాణలో కరోనాతో మరో ఐదుగురి మృతి

తెంగాణలో కొత్తగా 92 కరోనా పాజిటివ్ కేసులు నమోదయ్యాయి. కరోనాతో రాష్ట్రంలో సోమవారం (జులై 8) మరో ఐదు మంది మృతి చెందారు. తాజా కేసులతో రాష్ట్రంలో మొత్తం కేసుల సంఖ్య 3742కు చేరుకుంది. కరోనాతో మరణించిన వారి సంఖ్య 142కు చేరింది. జీహెచ్‌ఎంసీ పరిధిలో వైరస్ వ్యాప్తి కొనసాగుతూనే ఉండటం ఆందోళన కలిగిస్తోంది.

ఆదివారం ఒక్కరోజే రాష్ట్రంలో కరోనాతో 14 మంది మృతి చెందడం ఆందోళన కలిగించింది. ఒక్కరోజులో ఇప్పటివరకు ఇవే అత్యధిక మరణాలు. ఆదివారం కొత్తగా 154 కరోనా పాజిటివ్ కేసులు నమోదయ్యాయి. జీహెచ్ఎంసీ పరిధిలోనే 132 కేసులు నమోదయ్యాయి. ఆదివారం నాటికి రాష్ట్రంలో 1742 మంది కరోనా నుంచి కోలుకొని డిశ్చార్జ్ కాగా.. 1771 యాక్టివ్ కేసులు ఉన్నట్లు హెల్త్ బులెటిన్‌లో పేర్కొన్నారు.

టెన్త్ పరీక్షలు రద్దు, సినిమా షూటింగులకు గ్రీన్ సిగ్నల్
కరోనా మహమ్మారి కారణంగా నెలకొన్న క్లిష్ట పరిస్థితుల్లో పదో తరగతి పరీక్షలు రద్దు చేస్తూ తెలంగాణ ప్రభుత్వం కీలక నిర్ణయం తీసుకుంది. ప్రి ఫైనల్ పరీక్షల గ్రేడింగ్‌ల ద్వారా విద్యార్థులను పైతరగతులకు ప్రమోట్ చేయాలని ముఖ్యమంత్రి కేసీఆర్ అధికారులను ఆదేశించారు.

మరోవైపు.. లాక్‌డౌన్‌తో రెండున్నర నెలలుగా నిలిచిపోయిన సినిమాలు, టీవీ సీరియళ్ల షూటింగ్‌లకు అనుమతి ఇస్తూ సీఎం కేసీఆర్ సోమవారం మరో కీలక నిర్ణయం తీసుకున్నారు. కొవిడ్-19 మార్గదర్శకాలు, లాక్‌డౌన్ నిబంధనలు పాటిస్తూ సినిమా షూటింగులు నిర్వహించుకోవాలని ప్రభుత్వం సూచించింది. తక్కువ సిబ్బందితో షూటింగ్ కార్యక్రమాలు నిర్వహించుకోవాలని తెలిపారు. సినిమా హాళ్లు తెరిపించడానికి మరి కొన్ని రోజులు ఆగాల్సిందేనని స్పష్టం చేశారు.

Must Read: 4 లక్షలు దాటిన కరోనా మరణాలు

Also Read: గద్వాలతో పరువు హత్య.. కుమార్తెను చంపిన తల్లిదండ్రులు