ఉదయం కొడుకు జననం.. రాత్రికి తండ్రి హఠాన్మరణం.. సిద్దిపేటలో విషాదం

పండంటి బిడ్డ పుట్టాడనే సంతోషం ఆ కుటుంబంలో గంటల వ్యవధిలోనే పోయింది. ఉదయం బిడ్డ పుట్టడం.. దురదృష్టవశాత్తూ అదే రోజు రాత్రికి ఆ బిడ్డ తండ్రి మరణించిన ఘటన సిద్దిపేట జిల్లాలో చోటు చేసుకుంది. చేర్యాల మండలం ఆకునూరులో శుక్రవారం రాత్రి ఈ అత్యంత విషాదకర పరిణామం జరిగింది. ఆకునూరు గ్రామానికి చెందిన ఎర్రోళ్ల శ్రీనివాస్‌(30) హైదరాబాద్‌లోని నాంపల్లి కోర్టులో న్యాయవాదిగా పని చేస్తున్నారు. లాక్‌డౌన్‌ నుంచి కోర్టులకు వరుసగా సెలవులు ఉండడంతో శ్రీనివాస్‌ ఇంటికి వచ్చి గడుపుతున్నాడు. తీరిక సమయం దొరకడంతో ఇక్కడ వ్యవసాయం చేసుకుంటున్నాడు. అతని భార్య సౌమ్య గర్భిణి.

గురువారం ఆమెకు పురుటి నొప్పులు రావడంతో చేర్యాల ప్రభుత్వ ఆస్పత్రిలో చేర్పించారు. శ్రీనివాస్‌కు ఆరోగ్యం బాగా లేకపోవడంతో సిద్దిపేటలోని ఓ ప్రైవేటు హాస్పిటల్‌కు వెళ్లారు. పరీక్షల రిపోర్టులు ఆలస్యం కావడంతో రాత్రి అయిపోయింది. దీంతో సిద్దిపేట బస్‌స్టేషన్‌లోనే నిద్రపోయాడు. సిద్దిపేట ఆస్పత్రిలో శ్రీనివాస్‌ చికిత్స పొందుతుండగానే, చేర్యాలలో అతనికి కొడుకు పుట్టాడు. అదే రోజు రాత్రి 9గంటల తర్వాత శ్రీనివాస్‌ చనిపోయాడు. శ్రీనివాస్‌కు వైద్యులు కరోనా పరీక్షలు చేయించగా నెగెటివ్‌ అని వచ్చింది. కాగా, ఉదయం జన్మించిన కుమారుడిని చూడకుండానే తండ్రి హఠాన్మరం చెందడంతో గ్రామస్థులు కన్నీరుమున్నీరయ్యారు.

Also Read: undefined

రెండేళ్ల క్రితమే శ్రీనివాస్‌ వివాహం చేసుకున్నాడు. గత రెండు నెలల క్రితం శ్రీనివాస్‌ సోదరుడు మృతి చెందాడు. ఇప్పుడు మరో కొడుకు సైతం చనిపోవడంతో ఆ ఇంట్లో విషాదం అలుముకుంది.

Also Read: undefined