షాకింగ్! కీసర ఎమ్మార్వో కేసులో కలెక్టర్ హస్తం..? విచారణలో సంచలన విషయాలు

రూ.1.1 కోట్లు లంచం తీసుకుంటూ సంచలనం రేపిన కీసర ఎమ్మార్వో నాగరాజు కేసు విచారణలో రోజురోజుకూ కీలకమైన మలుపులు చోటు చేసుకుంటున్నాయి. ఈ కేసులో కీసర ఎమ్మార్వోతో పాటు పలువురు ఉన్నతాధికారుల పాత్ర కూడా ఉన్నట్లు విచారణలో వెల్లడైంది. ఓ కలెక్టర్‌, ఆర్డీవో, మరో తహసీల్దార్‌‌కు కూడా ఈ కేసుతో సంబంధాలు ఉన్నట్లు తేలిందని ఓ ప్రముఖ పత్రిక కథనం ప్రచురించింది. వరంగల్‌ జిల్లా హన్మకొండ ఎమ్మార్వో ద్వారా ఆర్డీవోతో నాగరాజుకు ఈ సొమ్ముతో ఒప్పందం కుదిరిందని కేసులో ఏ-3గా ఉన్న నిందితుడు శ్రీనాథ్‌ వాంగ్మూలం ఇచ్చారు. ఏసీబీ అధికారులకు పట్టుబడ్డ రూ.1.1 కోట్లను వరంగల్ నుంచి తెచ్చినట్లు విచారణలో తెలిసింది.

దయారాలోని 614, మరికొన్ని సర్వే నెంబర్లలోని 61 ఎకరాల 20 గుంటల భూమి.. సాయిరాజ్‌, అంజిరెడ్డి ద్వారా ఈ ఒప్పందం కుదరిందని అన్నారు. కలెక్టర్‌తో భూమి మ్యూటేషన్ చేయించే బాధ్యత ఆర్డీవో, ఎమ్మార్వో చూసుకుంటారని మాట్లాడుకున్నట్లు విచారణలో తెలిసింది. అయితే, ఆ కలెక్టర్ ఎవరనే విషయం తెలాల్సి ఉంది.

కలెక్టర్, ఆర్డీవో సూచన మేరకే భూ వివాదంపై మాట్లాడేందుకు గెస్ట్ హౌస్‌కి వెళ్లినట్లు ఏ-1 అయిన ఎమ్మార్వో నాగరాజు తెలిపారు. శ్రీనాథ్‌కు చెందిన ఎలాంటి భూ వివాదం తన పరిధిలో లేదని స్పష్టం చేశారు. తన పేరు మీద భారీగా ఆస్తులు ఉన్నట్లు నాగరాజు ఒప్పుకున్నట్లు తెలుస్తోంది. అయితే, 2011లోనే నాగరాజుపై ఏసీబీ ఆదాయానికి మించిన ఆస్తుల కేసు నమోదు చేసింది. అప్పటి ప్రభుత్వ లెక్కల ప్రకారం రూ.10 కోట్ల ఆస్తులను గుర్తించారు. ఇంకా అతని బినామీ ఆస్తులు, ఇతర పత్రాలకు సంబంధించి విచారణ కొనసాగుతోంది.

గతంలో ఎమ్మార్వో నాగరాజు తండ్రి డిప్యూటీ తహసీల్దార్‌గా పనిచేసేవారు. తన తండ్రి ఉద్యోగం ఆయనకు వచ్చింది. 1995లో టైపిస్టుగా నాగరాజు రెవెన్యూ శాఖలో చేరినట్లు అధికారులకు వెల్లడించారు. అక్కడి నుంచి ఘట్కేసర్, ఉప్పల్, కుత్బుల్లాపూర్, తాండూరు ప్రాంతాల్లో వివిధ హోదాలో పనిచేశారు.

Also Read: undefined

Must Read: undefined