TS: కొత్తగా 592 కొవిడ్ కేసులు.. 5 వేలకు చేరువలో యాక్టివ్ కేసులు

Hyderabad Covid Cases: తెలంగాణలో కొత్తగా 600లకు చేరువలో కరోనా కేసులు నమోదయ్యాయి. తాజా కేసులతో రాష్ట్రంలో యాక్టివ్ కేసుల సంఖ్య 5 వేల మార్క్‌కు చేరువైంది. జులైలో నాలుగోసారి 500లకు పైగా కేసులు నమోదవడం గమనార్హం. కొవిడ్ 19 కేసులు క్రమంగా పెరుగుతుండటంతో జాగ్రత్తలు తీసుకోవాలని అధికారులు సూచిస్తున్నారు. అటు మహారాష్ట్రలో ఒమిక్రాన్ సబ్ వేరియంట్లు బీఏ.4, బీఏ.5 కలకలం రేపుతుండటంతో సరిహద్దుల వద్ద అధికారులను అప్రమత్తం చేశారు.

Authored byశ్రీనివాస్ గంగం | Samayam Telugu 8 Jul 2022, 12:45 am

తెలంగాణలో రోజూవారీ కరోనా కేసులు (Telangana Corona Cases) 600లకు చేరువయ్యాయి. గురువారం (జులై 7) కొత్తగా 592 కరోనా కేసులు నమోదయ్యాయి. దీంతో రాష్ట్రంలో మొత్తం యాక్టివ్ కేసుల సంఖ్య 5 వేలకు చేరువయ్యాయి. ప్రస్తుతం రాష్ట్రంలో 4,997 యాక్టివ్ కేసులు ఉన్నాయని వైద్య, ఆరోగ్య శాఖ విడుదల చేసిన బులెటిన్‌లో పేర్కొన్నారు. ఇక నేడు కరోనా నుంచి మరో 477 మంది కోలుకొని డిశ్చార్జ్ అయ్యారు. రికవరీ రేటు 98.87శాతంగా ఉంది.

కొత్తగా నమోదైన కేసుల్లో హైదరాబాద్‌లో అత్యధికంగా 331 కేసులు నిర్ధారణ అయ్యాయి. రంగారెడ్డి జిల్లాలో 60, మేడ్చల్‌ మల్కాజ్‌గిరిలో 45, ఖమ్మంలో 17, నల్గొండ జిల్లాలో 11, హనుమకొండ జిల్లాలో 10, యాదాద్రి భువనగిరిలో 9, కరీంనగర్‌‌లో 9 కరోనా కేసులు నమోదయ్యాయి.

గడిచిన 24 గంటల్లో 27,488 మందికి కరోనా నిర్ధారణ పరీక్షలు నిర్వహించారు. ఇంకా 553 మందికి సంబంధించిన రిపోర్టులు అందాల్సి ఉందని వైద్యారోగ్య శాఖ బులెటిన్‌లో పేర్కొన్నారు. తెలంగాణలో కరోనా కేసులు గడిచిన 6 రోజుల్లో 4 సార్లు 500ల మార్కు దాటడం గమనార్హం.

TS: కొత్తగా 592 కొవిడ్ కేసులు.. 5 వేలకు చేరువలో యాక్టివ్ కేసులు

తరవాత కథనం