మంత్రి పదవి వస్తుందని ఆశ ఉండే..: మీడియా ముందు కంటతడి పెట్టుకున్న రామన్న

కేసీఆర్ చేపట్టిన కేబినెట్ విస్తరణ టీఆర్ఎస్ పార్టీలో పెద్ద దుమారమే రేపింది. మంత్రి పదవిపై ఆశపెట్టుకున్న పలువురు నేతలు తీరా కేబినెట్‌లో చోటు దక్కకపోవడంతో తమ అసంతప్తిని బహిరంగంగానే వెళ్లగక్కారు. మంత్రి పదవి దక్కలేదనే కారణంతో అజ్ఞ‌ాతంలోకి వెళ్లారని భావిస్తున్న ఆదిలాబాద్ ఎమ్మెల్యే జోగు రామన్న బుధవారం మీడియా ముందుకు వచ్చారు. గత రెండు రోజులుగా అందుబాటులో లేకపోవడానికి గల కారణాలు వివరించారు.

కేబినెట్‌లో కచ్చితంగా చోటు లభింస్తుందనే ఆశ ఉండేననీ, తీరా మంత్రి పదవి రాకపోవడంతో మనస్తాపానికి గురయ్యాయని తెలిపారు. బీపీ పెరిగి ఆస్పత్రిలో చేరానే, తప్ప అజ్ఞాతంలోకి వేళ్లే అవసరం తనకు లేదన్నారు. సర్పంచ్‌ స్థాయి నుంచి ఎమ్మెల్యే వరకు మచ్చలేని వ్యక్తిగా ఉన్న తనకు మంత్రి పదవి రాకపోవడం చాలా బాధ కలిగించిందంటూ కన్నీరు పెట్టుకున్నారు. తనకు మంత్రి పదవి రాకున్నా టీఆర్‌ఎస్‌ పార్టీలోనే కొనసాగుతానని, కేసీఆరే తమ నాయకుడు అని రామన్న చెప్పారు.

Read Also: ‘టీఆర్ఎస్‌కు ఆయన ఒక్కరే ఓనర్.. మిగిలిన వారంతా..’

తెలంగాణ ఆవిర్భావం తర్వాత ఏర్పాటైన కేసీఆర్‌ తొలి కేబినెట్‌లో జోగు రామన్నకు చోటు లభించింది. గత ప్రభుత్వంలో ఆయన అటవీ, పర్యావరణ మంత్రిగా పనిచేశారు. తాజాగా ఈ ప్రభుత్వంలోనూ మంత్రి పదవి దక్కుతుందని భావించారు. కానీ, ఉమ్మడి ఆదిలాబాద్‌ నుంచి ఇంద్రకరణ్‌రెడ్డికి మాత్రమే అవకాశం దక్కింది. అయితే తాజా విస్తరణలో కచ్చితంగా మంత్రి పదవి దక్కుతుందని గంపెడాశలు పెట్టుకున్నారు.

కానీ, తీరా అది రాకపోవడంతో గత మూడు రోజుల నుంచి అందుబాటులోకి రాలేదు. దీంతో ఆయన అలక పూనారనీ, అందుకే అజ్ఞాతంలోకి వెళ్లారిని మీడియాలో వార్తలు వచ్చాయి. దీంతో బుధవారం మీడియా ముందుకు వచ్చి ఆయన వివరణ ఇచ్చారు.

Read Also: పార్టీ మాదే.. పదవులూ మావే.. సీఎం పిలిస్తే వెళ్తా: నాయిని

మరోవైపు రామన్నకు కేబినెట్‌లో చోటు దక్కకపోవడంతో ఆదిలాబాద్ నియోజకవర్గంలో ఉద్రిక్త పరిస్థితులు చోటుచేసుకున్నాయి. తమ నేతకు మంత్రి పదవి రాలేదనే బాధతో ఓ అభిమాని కిరోసిన్ పోసుకొని ఆత్మహత్యా యత్నానికి పాల్పడ్డాడు. వెంటనే టీఆర్ఎస్ కార్యకర్తలు, పోలీసులు అప్రమత్తమై అడ్డుకోవడంతో ప్రాణాలతో బయటపడ్డాడు.