హైదరాబాద్‌లో మళ్లీ భారీ వర్షం.. లోతట్టు ప్రాంతాల వారిలో వణుకు.. వీడియో

నాలుగు రోజుల క్రితం హైదరాబాద్‌ను ముంచెత్తిన అతి భారీ వర్షం నుంచి ప్రజలు పూర్తిగా కోలుకోకముందే మళ్లీ అలాంటి సమస్యే ఎదురవుతోంది. శనివారం సాయంత్రం నుంచి నగర వ్యాప్తంగా అతి భారీ స్థాయిలో వర్షం పడుతోంది. ఉదయం నుంచి ఎండ కాయగా.. సాయంత్రం ఉన్నట్టుండి వాతావరణం మారిపోయి జోరున పెద్ద వాన కురిసింది. వనస్థలిపురం, హయత్‌నగర్‌, బీ.ఎన్‌.రెడ్డి, దిల్‌సుఖ్‌నగర్‌, కొత్తపేట, ఎల్బీ నగర్‌, సరూర్‌నగర్‌, సైదాబాద్, మలక్‌పేట, చంపాపేట, మన్సూరాబాద్, నాగోల్‌, హబ్సిగూడ, ప్రాంతాల్లో భారీ వర్షం కురిసింది. కూకట్‌పల్లి, రాయదుర్గం, పాతబస్తీ పరిధిలోని షేక్‌పేట, మదీనా, చార్మినార్‌, గోల్కొండ, టోలిచౌకి, లంగర్‌హౌజ్‌, మెహదీపట్నం, కార్వాన్‌, బహదూర్‌పుర, జూపార్క్‌, పురానాపూల్ ప్రాంతాల్లోనూ మోస్తరు వర్షం కురిసింది.

ఇటీవల కురిసిన వర్షంతో వరద నీరు పోయినప్పటికీ బురద పేరుకుపోవడంతో ప్రజలు ఇప్పటికీ ఇబ్బందులు పడుతూనే ఉన్నారు. మళ్లీ శనివారం సాయంత్రం నుంచి కురుస్తున్న వర్షంతో రోడ్లన్నీ మళ్లీ జలమయమం అయ్యాయి. దీంతో వాహనదారులు ఎప్పటిలాగే ఇబ్బందులు పడుతున్నారు.

నగరంలో మరోసారి వర్షాలు కురుస్తున్న నేపథ్యంలో అత్యవసర సహాయ బృందాలను అప్రమత్తం చేసినట్లు జీహెచ్‌ఎంసీ ఎన్‌ఫోర్స్‌మెంట్‌ డైరెక్టర్‌ విశ్వజిత్‌ తెలిపారు. నగర వ్యాప్తంగా ఓ మోస్తరు వర్షం కురిసే అవకాశం ఉందని ఆయన చెప్పారు. వరద ప్రభావంతో నీరు నిల్వ ఉన్న ప్రాంతాలకు ఇప్పటికే సిబ్బందిని పంపించినట్లు చెప్పారు. నీరు నిల్వ ఉండకుండా అన్ని చర్యలు తీసుకున్నట్లు వివరించారు. రెండు రోజులుగా పెరిగిన ఉష్ణోగ్రతలతో క్యుములోనింబస్ మేఘాలు ఏర్పడం వల్ల వర్షాలు పడుతున్నాయని, నగరంలో తేలికపాటి నుంచి మోస్తారు వర్షాలతో పాటు ఒకట్రెండు చోట్ల భారీ వర్షాలు పడే అవకాశం ఉందని వాతావరణశాఖ అధికారులు తెలిపారు.