కాలం మారింది.. అత్త ముక్కు కొరికేసిన కోడలు

గతంలో కోడళ్లు అత్తగారంటే వణికిపోయేవారు. ఆమె మాట జవదాటేవారు కాదు. అత్తను ఎదిరించి ఒక్క మాట మాట్లాడే సీన్ ఉండేది కాదు. అత్తగారి పెత్తనాన్ని కోడళ్లు మౌనంగానే భరించేవారు. కానీ కాలం మారిపోయింది. అత్తకు కోడలు భయపడే రోజులు పోయాయి. అత్తా కోడళ్ల మధ్య గొడవల్లో ప్రస్తుతం కోడళ్లదే పై చేయిగా కనిపిస్తోంది.

అత్త ఓ మాటంటే నేను రెండు అంటా అన్నట్టుగా కోడళ్లు వ్యవహరిస్తున్నారు. తాజాగా ఓ కోడలైతే నోటికి మరోలా పని చెప్పింది. ఏకంగా అత్త ముక్కును కొరికేసింది. జోగులాంబ గద్వాల జిల్లా అలంపూర్‌లో ఈ ఘటన చోటు చేసుకుంది. వివరాల్లోకి వెళ్తే..

గద్వాల జిల్లా మానవపాడు మంగలి వీధిలోని శారదమ్మ, జయ్యన్న దంపతులకు ప్రసాద్, భాస్కర్, శేఖర్‌ సంతానం. పెద్ద కొడుకు ప్రసాద్‌ అత్తగారి ఊరైన కర్నూలులో నివాసం ఉంటున్నాడు. అన్నదమ్ముల మధ్య తరచూ గొడవలు జరుగుతున్నాయి. ఈ క్రమంలోనే అత్త, చిన్న కోడలు మధ్య కూడా గొడవలు జరిగేవి. సోమవారం ఉదయం అన్నాదమ్ములిద్దరూ గొడవ పడ్డారు. దీంతో చిన్న కుమారుడు శేఖర్‌ భార్య రేవతి ఆగ్రహంతో అత్త శారదమ్మ ముక్కు కొరికింది. తీవ్రరక్తస్రావం కావడంతో ఆమెను ఆస్పత్రికి తరలించారు. శారదమ్మకు చికిత్స అందించిన డాక్టర్లు ముక్కుకు ఏడు కుట్లు వేశారు.