Amit Shah Tour: రోడ్‌ షోల్లో అమిత్ షా.. హైదరాబాద్‌పై తెలుగులో ట్వీట్

జీహెచ్ఎంసీ ఎన్నికల ప్రచారం కోసం హైదరాబాద్‌కు వచ్చిన కేంద్ర హోం మంత్రి అమిత్ షా తెలుగులో ట్వీట్ చేశారు. తెలంగాణ ప్రజల ఆప్యాయత, అనురాగానికి ముగ్ధుడనయ్యానని ట్వీట్‌లో పేర్కొన్నారు. ‘‘హైదరాబాద్ చేరుకున్నాను. తెలంగాణ ప్రజల ఆప్యాయతకు మరియు మద్దతుకు ముగ్దుడనైయ్యాను.’’ అంటూ అమిత్ షా ట్వీట్ చేశారు. హైదరాబాద్ చేరుకున్న వెంటనే అమిత్ షా చార్మినార్ వద్ద ఉన్న భాగ్యలక్ష్మి అమ్మవారిని దర్శించుకున్నారు. ఇక్కడ ప్రత్యేక పూజలు చేశారు.

భాగ్యలక్ష్మి దేవాలయం దర్శనం అనంతరం కూడా అమిత్ షా తెలుగులో మరో ట్వీట్ చేశారు. ‘‘హైదరాబాద్ పర్యటన సందర్భంగా భాగ్యలక్ష్మి అమ్మవారి ఆలయాన్ని సందర్శించుకొని, అమ్మ ఆశీస్సులు అందుకున్నాను. తెలంగాణ ప్రజల శ్రేయస్సు కోసం అమ్మవారిని ప్రత్యేకంగా ప్రార్థించాను. భాగ్యలక్ష్మి అమ్మవారు, దేశ ప్రజలందరికీ కూడా ఆయురారోగ్యాలను, సుఖసంతోషాలను ప్రసాదిస్తుందని నమ్ముతున్నాను.’’ అంటూ మరో ట్వీట్ చేశారు. అక్కడి నుంచి అమిత్ షా బీజేపీ తరపున రోడ్ షోల్లో పాల్గొనేందుకు పలు ప్రాంతాల్లో పర్యటిస్తున్నారు.

అమిత్ షా రాకతో చార్మినార్‌ భాగ్యలక్ష్మి ఆలయం దగ్గర మూడంచెల భద్రత ఏర్పాటు చేశారు. ఆ తరువాత సికింద్రాబాద్ పార్లమెంటరీ పరిధిలోని వారాసిగూడ నుంచి సీతాఫల్‌ మండి హనుమాన్‌ టెంపుల్‌ వరకు అమిత్ షా రోడ్‌ షో నిర్వహిస్తారు. మధ్యాహ్నం 1.30 నుంచి సాయంత్రం 4 గంటల వరకు బీజేపీ ఆఫీసుకు వెళ్లనున్నారు. సాయంత్రం 5 గంటలకు తిరిగి ఢిల్లీకి హోంమంత్రి బయల్దేరి వెళ్లనున్నారు. షా పర్యటనతో పాతబస్తీలో ట్రాఫిక్ ఆంక్షలు విధించారు.