MLC కవితపై అనుచిత వ్యాఖ్యలు.. రాష్ట్ర మహిళా కమిషన్‌కు బండి సంజయ్ లేఖ

Bandi Sanjay Kumar: ఢిల్లీ లిక్కర్ స్కాంలో ఆరోపణలు ఎదుర్కొంటున్న బీఆర్ఎస్ ఎమ్మెల్సీ కవితపై బీజేపీ తెలంగాణ అధ్యక్షుడు బండి సంజయ్ చేసిన అనుచిత వ్యాఖ్యలు తీవ్ర దుమారం రేపాయి. సంజయ్ వాఖ్యలను వ్యతిరేకిస్తూ రెండ్రోజుల క్రితం బీఆర్ఎస్ శ్రేణులు రాష్ట్రవ్యాప్తంగా ఆందోళనలు చేపట్టారు. బండి సంజయ్ కవితకు క్షమాపణలు చెప్పాలని డిమాండ్ చేశారు. సంజయ్ చేసిన వ్యాఖ్యలపై బీఆర్ఎస్ నేతలతో పాటు సొంత పార్టీ బీజేపీకి చెందిన కొందరు నేతలు కూడా వ్యతిరేకించారు. సంజయ్ చేసిన వ్యాఖ్యలు ఆయన వ్యక్తిగతమని పార్టీతో సంబంధం లేదని బీజేపీ నేత, నిజామాబాద్ ఎంపీ ధర్మపురి అర్వింద్ అన్నారు. మరోవైపు సంజయ్ అనుచిత వ్యాఖ్యలపై రాష్ట్ర మహిళా కమిషన్‌ కూడా సీరియస్ అయ్యింది. ఆయన వ్యాఖ్యలపై సుమోటోగా కేసు నమోదు చేసుకున్న మహిళా కమిషన్ సోమవారం నోటీసులు జారీ చేసింది. ఈనెల 15 లోపు విచారణకు హాజరు కావాలని నోటీసుల్లో పేర్కొంది. మహిళా కమిషన్ జారీ చేసిన నోటీసులపై తాజాగా బండి సంజయ్ స్పందించారు. ఈనెల 18న విచారణకు హాజరవుతానని స్పష్టం చేశారు. పార్లమెంట్ సమావేశాలు ఉన్నందున ఈనెల 15న విచారణకు హాజరు కాలేనని.., 18న హాజరవుతానని చెప్పారు. ఈ మేరకు ఆయన రాష్ట్ర మహిళా కమిషన్‌కు లేఖ రాశారు.