Bathukamma Sarees 2022: కోటి బతుకమ్మ చీరలు.. రేపటి నుంచే పంపిణీ

Bathukamma Sarees 2022 తెలంగాణ ఆడపడుచులకు మంత్రి కేటీఆర్(KTR) గుడ్‌న్యూస్ చెప్పారు. రాష్ట్ర ప్రభుత్వం అందించే బతుకమ్మ చీరలను గురువారం నుంచి పంపిణీ చేయనున్నట్లు వెల్లడించారు. దసరా, బతుకమ్మ పండగల నేపథ్యంలో ప్రభుత్వం కోటి చీరలను పంపిణీ చేస్తోందని తెలిపారు. చీరల తయారీ కోసం ప్రభుత్వం రూ.330.73 కోట్లు ఖర్చు చేసినట్లు తెలిపారు.

ఈ ఏడాది 24 విభిన్న డిజైన్లు 10 రకాల ఆకర్షణీయమైన రంగుల్లో మొత్తం 240 రకాల త్రెడ్ బోర్డర్లతో చీరలు సిద్ధం చేశారు. 92.00 లక్షల రెగ్యులర్ చీరలకు అదనంగా ఉత్తర తెలంగాణ జిల్లాలలో వయోవృద్ధ మహిళలు ధరించే 9.00 మీటర్లు పొడవు గల 8 లక్షల చీరలు సిద్ధం చేశారు. బతుకమ్మ చీరల తయారీతో నేతన్నల జీవితాలలో వెలుగులు నిండాయని కేటీఆర్ పేర్కొన్నారు. ఈసారి కోటి మంది తెలంగాణ ఆడబిడ్డలకు బతుకమ్మ కానుక ఇవ్వడం సంతోషంగా ఉందని ముఖ్యమంత్రి కేసీఆర్ పేర్కొన్నారు.

రేపటి నుంచి అన్ని జిల్లాల్లో మంత్రులు, ఎమ్మెల్యేలు, స్థానిక ప్రజాప్రతినిధుల ఆధ్వర్యంలో బతుకమ్మ చీరల పంపీణీ కార్యక్రమం ప్రారంభం కానుంది. రేషన్ కార్డుల ఆధారంగా అర్హులైన మహిళలకు బతుకమ్మ చీరలు పంపిణీ చేయనున్నారు. దసరా, బతుకమ్మ పండుగను పురస్కరించుకుని తెలంగాణ రాష్ట్ర వ్యాప్తంగా ప్రతి ఆడపడుచుకు తెలంగాణ ప్రభుత్వం ఏటా చీరలు పంపిణీ చేస్తోంది. రేషన్ కార్డులో పేరు ఉండి 18 ఏళ్లు పైబడిన అర్హులైన ప్రతి మహిళలకు చీరలు అందించనున్నారు. ఇందుకోసం ప్రభుత్వ యంత్రాంగం అన్ని ఏర్పాట్లు చేసింది.