యాప్నగరం

భద్రాద్రి ఎస్పీ భేషైన నిర్ణయం.. భార్యకు ప్రభుత్వ ఆసుపత్రిలో ప్రసవం

కొత్తగూడెం ఎస్పీ సునీల్ దత్ భేష్ అయిన నిర్ణయం తీసుకున్నారు. తన భార్యకు ప్రభుత్వ ఆసుపత్రిలో ప్రసవం చేయించారు. దీంతో ఆయనపై ప్రశంసల వర్షం కురుస్తోంది.

Samayam Telugu 28 Jul 2020, 2:51 pm
Samayam Telugu bhadradri kothagudem sp
ప్రభుత్వ హాస్పిటళ్లు అంటేనే జనం భయపడుతున్న పరిస్థితి. పేదలకు ఎలాగో తప్పదు కానీ.. కాస్త ఆర్థిక స్థోమత ఉన్నవాళ్లు ఇప్పటికీ ప్రయివేట్ హాస్పిటళ్ల వైపే మొగ్గు చూపుతున్నారు. సర్కారీ వైద్యం బాగోదనే అపోహ సమాజంలో బలంగా నాటుకుపోయింది. ఇలాంటి పరిస్థితుల్లో భద్రాద్రి కొత్తగూడెం ఎస్పీ సునీల్ దత్ అందరికీ ఆదర్శంగా నిలిచేలా వ్యవహరించారు. కరోనా విజృంభిస్తోన్న తరుణంలో ఆయన భేష్ అనిపించే నిర్ణయం తీసుకున్నారు.

ప్రభుత్వ ఆసుపత్రుల్లో అనేక వసతులు ఉన్నా అనవసరంగా ఆందోళన చెందుతున్న వారి అపోహలను పోగొట్టడం కోసం.. తన భార్యకు కొత్తగూడెం జిల్లా ప్రభుత్వ హాస్పిటల్‌లో ఆయన కాన్పు చేయించారు. తన భార్య రెండో ప్రసవం కోసం ప్రభుత్వ హాస్పిటల్‌ గైనకాలజిస్ట్ డాక్టర్ సరళను ఆయన సంప్రదించారు. గత మూడు నెలలుగా ప్రభుత్వ ఆసుపత్రిలోనే ఆమెకు రెగ్యులర్‌గా చెకప్‌లు నిర్వహించారు.

తన సతీమణికి సర్కారు దావఖానలోనే ప్రసవం చేయించగా.. ఆమెకు పండంటి బాబు జన్మించాడు. అందరికీ ఆదర్శంగా నిలిచేలా నిర్ణయం తీసుకున్న ఎస్పీ సునీల్ దత్‌పై జిల్లా కలెక్టర్ ఎంవీ రెడ్డి ప్రశంసలు గుప్పించారు.

భద్రాచలం ఐటీడీఏ పీవోగా పనిచేస్తున్న సమయంలో ఐఏఎస్ అధికారి గౌతమ్ కూడా తన భార్యకు ప్రభుత్వ హాస్పిటల్‌లో ప్రసవం చేయించారు. భద్రాచలం ఏరియా హాస్పిటల్‌లో ఆయన భార్య పండంటి పాపకు జన్మనిచ్చింది.

తరవాత కథనం

Telugu News App: ఏపీ, తెలంగాణకు సంబంధించిన లేటెస్ట్ అప్‌డేట్స్‌, జాతీయ, అంతర్జాతీయ, ఎడ్యుకేషన్, బిజినెస్, సినిమా, ఆధ్యాత్మికం, స్పోర్ట్స్, వైరల్ కథనాల కోసం తెలుగు సమయం యాప్‌ను డౌన్‌లోడ్ చేసుకోండి.
తాజా వార్తల అప్డేట్ల కోసం Samayam Telugu ఫేస్‌బుక్పేజీను లైక్ చెయ్యండి.